З 30 студзеня да 1 лютага на трох паверхах Рэспубліканскага палаца культуры прафсаюзаў у Мінску дзейнічала турыстычная выстава "Прафтур-2018". Наведвальнікі маглі падабраць для сябе адпачынак на любы густ: анімацыйны тур выхаднога дня на турбазах "Беларустурыста", экскурсійную праграму за мяжой, адпачынак ля марскога пабярэжжа ці ў санаторыі.

Гэта мерапрыемства-важны і значны ўклад прафсаюзнай арганізацыі ў развіццё турызму ў Беларусі. На адкрыцці выставы старшыня Федэрацыі прафсаюзаў Міхаіл Орда заўважыў, што ў многіх краінах свету гэты сектар эканомікі прыносіць значны прыбытак і забяспечвае прадуктыўную занятасць людзей. Турызм дае стымул для развіцця гандлю, грамадскага харчавання, транспарта і іншых сфер дзейнасці. З'яўляюцца новыя магчымасці для самазанятасці людзей.

Асаблівая ўвага надавалася прамысловаму турызму, бо цікавасць да яго расце. Як расказала генеральны дырэктар Турысцка-экскурсіённага прадпрыемства "Беларустурыст" Людміла Сянкоўская, іх калекцыя экскурсій на заводы, фабрыкі і іншыя прадпрыемствы Беларусі-самая поўная ў краіне. Напрыклад, толькі "Беларустурыст" прапануе наведаць смеццеперапрацоўчы завод. Гэта не проста захапляльная паездка: адна справа чуць, што адходы трэба сартаваць, зусім іншая-уласнымі вачыма ўбачыць, што з іх нараджаюцца карысныя рэчы. Дзеці ў захапленні ад наведвання фабрыкі цацак, ёсць паездка на ферму, дзе вырошчваюць фарэль, і экскурсіі за кулісы тэатра.

 Навінка сёлетняга года ад "Беларустурыста"-камфартабельныя і бюджэтныя аўтобусныя туры да Чорнага мора. Усе аб'екты размяшчэння-гатэлі на першай берагавой лініі. Для тых, хто хоча спалучыць адпачынак з лячэннем, прапануюцца прафсаюзныя санаторыі. Яны шырока прадстаўляліся на выставе. Усе жадаючыя маглі прама на месцы выпрабаваць на сабе навейшае медыцынскае абсталяванне і пачаставацца кіслародным кактэйлем. Дарэчы, сёлета "Белпрафсаюзкурорт" прапануе 25-працэнтную скідку членам прафсаюза не толькі на пуцёўку ў санаторый, але і на ўсе дадатковыя платныя паслугі.

Нямала цікавых тураў прапаноўвалі расійскія тураператары, прадстаўнікі Украіны, Грузіі, Азербайджана, Латвіі, Арменіі.

Уразіла наведвальнікаў яркая анімацыйная праграма. З яе даведаліся, як мяняліся перавагі беларусаў у стравах на працягу стагоддзяў. Адбылася дэгустацыя шматлікіх прысмакаў. Вядомы інтэлектуал тэлегульні "Што? Дзе? Калі?" Барыс Бурда правёў майстар-клас з удзельнікамі тэлепраграмы "Гатуем разам". Прэзентаваў свой экскурсійна-гастранамічны трохдзённы тур "Смачна ў Адэсе з Барысам Бурдой".

Менавіта з наведвання прафсаюзнай турыстычнай выставы ў сталіцы пачынаўся першы дзень форуму "Роля рэгіянальных СМІ ў развіцці сацыяльнага партнёрства", які для журналістаў з нашай краіны арганізавалі Федэрацыя прафсаюзаў Беларусі і Міністэрства інфармацыі.
На наступны дзень адбылося пленарнае пасяджэнне з удзелам Міхаіла Орды, начальніка ўпраўлення інфармацыйна-аналітычнай работы Міністэрства інфармацыі Таццяны Хмель, намесніка старшыні Федэрацыі прафсаюзаў Беларусі Алены Манкевіч. Адбыўся адкрыты дыялог, абмяркоўвлі надзённыя пытанні, закраналі праблемы. Напрыклад, пра сітуацыю ў эканоміцы, калі стварыць новае прадпрыемства не складана, а адукаваць людзей, прадаць прадукцыю няпроста. Кіраўнік Федэрацыі прафсаюзаў закрануў праблемы, у якіх даводзіцца разбірацца арганізацыі. А асноўная мэта яе дзейнасці-захаванне і ўмацаванне здароўя насельніцтва, стварэнне спрыяльных умоў для працы і адпачынку.

Прадстаўнікоў сродкаў масавай інфармацыі заклікалі больш актыўна супрацоўнічаць з прафсаюзамі, арганізоўваць сумесныя праекты, тлумачыць узнікаючыя праблемы, адказваць на запыты сучаснага чытача. У прафсаюзнай арганізацыі і ў СМІ агульная задача-павышаць дабрабыт людзей. Для заахвочвання сумеснай плённай дзейнасці вырашана праводзіць штогадовы конкурс на лепшае асвячэнне прафсаюзнай тэматыкі. 

Наталія СТАНКЕВІЧ.