28 лютага ў Гомелі затрымалі 200 прыхільнікаў ЧВК Рэдан. Назаўтра ў Брэсце міліцыя спыніла правядзенне падобнай несанкцыянаванай акцыі. У суседняй Расіі гэты новы накірунак у маладзёжнай субкультуры распаўсюджваецца надта імкліва. Бацькі з заміраннем сэрца правяраюць тэлефоны і асабістыя рэчы дзяцей – ці не далучыліся яны да небяспечнага руху.

Што такое ЧВК?

ЧВК Рэдан з’явілася на аснове японскага анімэ Hunter x Hunter (у перакладзе з англ. мовы «паляўнічы на паляўнічага») аб злачыннай групіроўцы «Геней Рэдан». Там гэта атрад элітных байцоў, якіх яшчэ называюць «павукамі» з-за сімволікі. Самі «рэданаўцы» лічаць сябе «баявымі нефармаламі».

Дарэчы, абрэвіятура ЧВК не мае дачынення да прыватных ваенных кампаній – яна ўзята проста для пафасу. 

Знешнія прыкметы – павук і лічба 4

Выява павука з лічбай чатыры на спіне (сімволіка з анімэ) на чорным адзенні, доўгія валасы. Даволі бяскрыўдны вобраз, падобны на гатычны, які быў папулярны ў падлеткаў з 1990-х. Адно істотнае адрозненне ад таго часу – цяпер ёсць інтэрнэт і захапленне відэакантэнтам. Падлеткі сустракаюцца групамі ў некалькі сотняў чалавек на вялікіх пляцоўках. Напрыклад, у гандлёвых цэнтрах, каб справакаваць патасоўку. Дзейства здымаюць на тэлефоны. Толькі ў адной групе ў Telegram, куды выкладваюць відэа сваіх «подзвігаў», амаль мільён падпісчыкаў.

Чым пагражае захапленне

Падобныя «акцыі» ўспыхваюць у вялікіх гарадах Расіі і Украіны з зайздросным пастаянствам. Дабраліся і да Беларусі. Праўда, у Гомелі праваахоўнікі спрацавалі хутка. Без прымянення фізічнай сілы даставілі ва ўчастак 200 чалавек, 183 з якіх аказаліся непаўналетнімі. Пасля разбіральніцтва ўсіх затрыманых перадалі бацькам.

Падлеткі да 16 гадоў атрымаюць папярэджанне, іх паставяць на ўлік у інспекцыю па справах непаўналетніх. Старэйшым можа пагражаць адміністрацыйная адказнасць.

Спыніць на корані

У тыя ж «ліхія 90-я» можна было атрымаць кухталёў ад аднагодкаў за доўгія валасы і некласічны выгляд. Ідэя ЧВК Рэдан у тым, што нефармалы хочуць нагадаць грамадству, што яны не слабакі – могуць даць здачы. Аб’яднаўшыся, нібы заступаюцца за сваіх.

Іншыя маладзёжныя субкультуры, накшталт футбольных фанатаў у Расіі, ужо «точаць зуб» на «анімэшнікаў» і збіраюцца адлоўліваць падлеткаў, якія носяць сімволіку павука на адзенні. Тыя, чыя маладосць прыпала на 80-я, добра памятаюць, як хадзілі «вёска на вёску», «клуб на клуб» і біліся да сур’ёзных траўм з прымяненнем розных падручных сродкаў. Калі гэты рух не спыніць яшчэ ў зародку, патасоўкі могуць перарасці ў забойствы.

Праваахоўнікі і педагогі папярэджваюць бацькоў пра небяспеку падобных фарміраванняў. Заклікаюць звяртаць больш увагі на захапленні сваіх дзяцей, кантраляваць, з кім яны маюць стасункі, у тым ліку ў інтэрнэце. Лепш за ўсё падпісацца на акаўнт дзіцяці ў сацсетках, каб адсочваць кола яго віртуальных знаёмых. Гэта дапаможа даведацца пра небяспеку.

Наталія СТАНКЕВІЧ.

Фота для ілюстрацыі.