Дзяржаўная маёмасць не павінна пуставаць. Без належнага догляду будынкі прыходзяць у заняпад і псуюць краявіды. Таму прыярытэтная задача дзяржавы – удыхнуць у іх другое жыццё. Вынікі гэтай работы за першае паўгоддзе 2022-га разгледзелі на пасяджэнні прэзідыума раённага Савета дэпутатаў.

Сёлета планавалася ўцягнуць у гаспадарчы абарот продажам праз аўкцыён комплексы будынкаў былых школ у Мілашове, Волкаўшчыне, Дворным Сяле і кацельню ў Даўгінаве. Два з іх ужо маюць новых гаспадароў. Кацельня за адну базавую велічыню стала ўласнасцю прыватнага прадпрыемства «ЗорынЛес», школу ў Мілашове набыла фізічная асоба. Аўкцыёны па астатніх аб’ектах пакуль безвыніковыя.

Прынята рашэнне знесці шэсць аб’ектаў, у тым ліку будынак клуба і бібліятэкі ў аграгарадку Папшулі, што на балансе аддзела ідэалагічнай работы, культуры і па справах моладзі райвыканкама. Работы планавалі выканаць у другім квартале, але тэмпы замарудзіліся з-за адсутнасці грашовых сродкаў.

Павінна справіцца з заданнем Міёрская ЦРБ, якой у трэцім квартале належыць знесці будынак пральні і хлеў па вуліцы Ізварына, 1. Прыбралі хлеў у Канахах, там жа засталося памяшканне былога ФАПа. Яшчэ ў першым квартале вызваліў ад гаража вуліцу Камсамольскую, 28 сектар спорту і турызму райвыканкама.

Зацверджаны і абласны пералік зносу, куды ўвайшлі ўсе шэсць аб’ектаў раённай камунальнай уласнасці і адзін – акцыянернага таварыства. На збожжасушылцы ў Дзянісаве ААТ «Мікалаёўскі» сёлета правялі дэмантаж на суму звыш 5,8 тысячы рублёў. Да канца верасня плануецца завяршыць работы. 

У каляндарны графік уцягнення ў гаспадарчы абарот невыкарыстоўваемай маёмасці акцыянерных таварыстваў з доляй раённай камунальнай уласнасці ўключаны тры аб’екты райаграсэрвісу, якія цяпер на кансервацыі. Мяркуюць выкарыстоўваць іх ва ўласных мэтах ужо ў чацвёртым квартале. У тым жа пераліку два аб’екты ААТ «Мікалаёўскі»: у арачным збудаванні хацелі складаваць сена, сушылку плануюць дэманціраваць.

На кантролі камісіі райвыканкама і былых балансатрымальнікаў, як новыя гаспадары выконваюць абавязковыя ўмовы, прадугледжаныя дагаворам куплі-продажу аб’ектаў за адну базавую велічыню. Па комплексе капітальных будынкаў на хутары Дубашынскі Двор, якім валодае ААТ «БелЛесаТэхніка», дагавор заключаны 28 снежня 2016-га. Прадугледжвалася, што будзе ажыццяўляць прадпрымальніцкую дзейнасць не менш за год, пачынаючы не пазней за 12 месяцаў пасля падпісання дакумента. Пакупнік умову не выканаў, на сувязь не выходзіць. УП ЖКГ – як былы ўласнік – накіраваў у эканамічны суд вобласці дакументы на скасаванне дагавора і вяртанне аб’екта ў раённую камунальную ўласнасць. Пытанне разгледзяць у верасні.

Комплекс будынкаў былой школы ў аграгарадку Цвеціна прадалі ў 2018-м годзе УП «Цітова». З-за цяжкага фінансавага становішча прадпрыемства яго вярнулі ў раённую камунальную ўласнасць і перадалі аддзелу па адукацыі.

Будынкі былой школы ў Пераброддзі ў красавіку 2020-га набыла ААТ «Вендарожскія азёры» Магілёўскай вобласці. Адтэрміноўка пачатку дзейнасці складала 24 месяцы. Пакупнік заключыў чатыры дагаворы арэнды, заказаў праект рэканструкцыі будынка і добраўпарадкавання тэрыторыі, плануе ў трэцім квартале размясціць там лазні і альтанкі.

Былая школа ў Даўгінаве выкарыстоўваецца з мінулагодняга чэрвеня. Будынак выкупіў індывідуальны прадпрымальнік і рэканструяваў памяшканні пад жылыя або для вядзення падсобнай гаспадаркі.

Сядзібны дом у Асада-Дзедзіне стаў уласнасцю мінчаніна ў жніўні летась. Пакупнік арганізаваў работу па ўборцы будаўнічага смецця, а вывезці яго не можа, бо аб’ект мае статус гісторыка-культурнай каштоўнасці. Плануе заказаць праект па рэстаўрацыі.

Будынак былой пачатковай школы ў Дзісне ў 2021-м годзе набыло ТАА «Аўтасэр- віс-Дзвіна». Гаспадар частку памяшканняў здаў у арэнду, у другой складуе піламатэрыялы. Вядзе рамонт, трымае ў парадку прылеглую тэрыторыю. Былую школу ў Мілашове сёлета ў маі прадалі гамяльчанцы.

Балансатрымальнікам невыкарыстоўваемай маёмасці даручана сёлета выканаць тэрміны ўцягнення ў гаспадарчы абарот, правесці інвентарызацыю аб’ектаў, вызначыўшы спосаб уцягнення ў абарот, крыніцы і аб’ёмы фінансавання.

Згодна з пералікам аб’ектаў раённай камунальнай уласнасці, дзяржрэгістрацыі ў 2020-2022 гадах належала 169 аб’ектаў. Летась яе правялі ў адносінах да 11, за студзень – чэрвень сёлета – 24. Яшчэ пяць выключылі з пераліку. Па стане на 1 ліпеня неабходна зарэгістраваць 134.

Кіраўнікам арганізацый даручана актывізаваць работу ў гэтым накірунку. У якасці крыніц фінансавання выкарыстоўваць сродкі, атрыманыя ад рэалізацыі маёмасці на аўкцыённых таргах, ад здачы ў арэнду абсталявання, транспартных сродкаў, капітальных будынкаў, ад продажу другасных матэрыяльных рэсурсаў.

Агульная плошча дзяржаўнай маёмасці 24 суб’ектаў гаспадарання раённай камунальнай уласнасці склала 252 тысячы м², з іх 52,5 тысячы м² перадалі ў бязвыплатнае карыстанне, 2,8 тысячы – у арэнду, не выкарыстоўваецца 12,1 тысячы. За першае паўгоддзе арандатары ўнеслі 52,4 тысячы рублёў. Арэндадаўцы пералічылі ў бюджэт 8,6 тысячы рублёў, запазычанасці перад бюджэтам не маюць. Дванаццаць аддзелаў і ўстаноў райвыканкама і арганізацый раёна здаюць невыкарыстоўваемыя плошчы ў арэнду і бязвыплатнае карыстанне.

На 1 ліпеня запазычанасць арандатараў па арэнднай плаце перад аддзелам па адукацыі райвыканкама склала 0,89 тысячы рублёў, Міёрскай ЦРБ – 3 тысячы. Агульная сума за першае паўгоддзе перабольшыла 3 тысячы рублёў, таму задача здымшчыкаў – штомесячна змяншаць запазычанасць, каб цалкам яе пагасіць. 

Алена ВАРОНІНА