Пры спальванні прыроднага газу ўтвараецца чадны. Ён не мае ні паху, ні колеру. Пры ўтрыманні ў паветры ўсяго 0,04 % чаднага газу прыкладна 30 % крыві ўступае ў хімічнае злучэнне з вокісам вугляроду. Ён высокатаксічны – знаходзіцца хаця б пяць хвілін у памяшканні, дзе яго канцэнтрацыя 0,5 %, небяспечна для жыцця. А ўдыханне паветра, дзе ўтрымліваецца ўсяго 0,1 % чаднага газу, прыводзіць да смяротнага атручвання за няпоўныя тры гадзіны. Таму трэба быць напагатове.

Пры адсутнасці цягі ў дымаходзе чадны газ, які выдзяляецца пры гарэнні полымя, трапляе ў памяшканне. Праверыць яе можна, запаліўшы запалку. Калі полымя ўцягваецца ў дымаход – усё ў парадку, адхіляецца ў бок – цягі няма.

 
Абмярзанне агалоўкаў дымахода, моцны пераменны вецер, дождж, снегапад, туман могуць стаць прычынамі парушэння цягі. У выніку ядавітыя рэчывы, якія ўтрымліваюцца ў прадуктах згарання, трапляюць у памяшканне і выклікаюць атручванне і смерць. Перад уключэннем прыбораў з адводам прадуктаў згарання ў дымаход упэўніцеся, што не пахне газам, адчыніце фортку і вызваліце падрэз у ніжняй частцы дзвярэй для прытоку паветра. Калі ёсць цяга, дзейнічайце згодна з інструкцыяй. Праз тры – пяць хвілін пасля ўключэння паўторна праверце цягу.

 
Забаронена: карыстацца няспраўнымі газавымі прыборамі, уключаць іх пры няспраўнай аўтаматыцы бяспекі і адсутнасці цягі ў дымавым і вентканалах, самастойна выпраўляць паломкі, уключаць апарат людзям, якія не прайшлі інструктаж па бяспечным карыстанні, а таксама ў стане алкагольнага ці наркатычнага ап’янення.

 
Будзьце асабліва ўважлівыя зімой пры карыстанні газавымі ацяпляльнымі і воданагравальнымі прыборамі. У невялікія маразы сценкі дымахода моцна ахалоджваюцца, на іх збіраецца кандэнсат вадзяных пароў. З-за гэтага ў верхніх участках утвараюцца ледзяныя пробкі, якія перакрываюць выхад прадуктам згарання і парушаюць цягу. Для бяспекі – уласнай і сваіх родных – устанавіце аўтаномны пажарны апавяшчальнік чаднага газу СО. Яго можна набыць у Міёрскім раёне газазабеспячэння за 22,46 рублёў.

 Газ – крыніца павышанай небяспекі. Будзьце пільныя!

Канстанцін МАТЭЛЕНАК, начальнік Міёрскага РГЗ.

Фота для ілюстрацыі.