Намесніку рэдактара "Міёрскіх навін" Леаніду Матэленку аб'яўлена падзяка ад старшыні абласнога камітэта прыроднай галіны Руслана Вінакурава за прапаганду экалагічных ведаў і актыўную работу па асвячэнні экалагічнай тэматыкі ў сродках масавай інфармацыі. Журналіст доўгі час вядзе старонку "Чалавек і прырода", шукае цікавыя і актуальныя тэмы, у знаходжанні і раскрыцці якіх яму вельмі спрыяе кіраўнік прыродаахоўнай сферы раёна Іван Рунда. Паціснуты мужчынскія рукі, а значыць, і надалей творчае супрацоўніцтва мае быць плённым. У падарунак Леаніду Матэленку манаграфія "Рэдкія біятопы Беларусі". Як іх выявіць і захаваць—цяпер даведаюцца і ў рэдакцыі. 

—Вось пашпарты азёр, складзеныя напрыканцы 1944-га на ўсе прыродныя вадаёмы тагачаснага Міёрскага раёна, прывёз з полацкага музея,—паказвае Івану Пятровічу журналіст, не спыняючыся перад новай цікавай інфармацыяй. Вялікая натуральная апантанасць нязбочна вядзе да вышынь. Так што, віншуем, калега! Імпэту і надалей.