Сельскагаспадарчыя расліны і жывёлы, тэхналогіі вытворчасці сельгаспрадукцыі, тэхнічнае і энергетычнае забеспячэнне прадпрыемстваў АПК. Пра гэта і шмат чаго іншага даведаліся вучні аграрнай групы 10 класа Дзісненскай СШ імя М. Кузьміна на занятках факультатыва «Увядзенне ў аграрныя прафесіі». На павышаным узроўні вывучалі фізіку і біялогію.

У аграрнай групе шэсць навучэнцаў. Згодна з планам па рэалізацыі Праграмы развіцця профільных класаў аграрнай скіраванасці, для іх праводзіліся індывідуальныя кансультацыі па пытаннях будучага працаўладкавання, прафарыентацыйная гадзіна «Аграрная адукацыя ў Рэспубліцы Беларусь» і іншыя тэматычныя мерапрыемствы.

У рамках праекта ШАГ і прафарыентацыйных сустрэч дыялогі са старшакласнікамі вялі старшыня раённага Савета дэпутатаў Валерый Драба, намеснік старшыні райвыканкама Яўген Нікалаёнак, кіраўнікі ААТ «Туркова» і «Мікалаёўскі» Іван Юрашак і Мікалай Шупілаў, галоўны спецыяліст упраўлення па сельскай гаспадарцы і харчаванні Алена Марцілёнак, выкладчыкі сельгасакадэміі, Лепельскага і Полацкага аграрна-тэхнічных каледжаў.

Падчас аграсубот вучні пабывалі на экскурсіях у жывёлагадоўчым комплексе «Цвеціна» СУП «Цітова» і міёрскай вытворчасці філіяла Полацкага хлебазавода, азнаёміліся з працэсам падрыхтоўкі насення да пасяўной у раённай інспекцыі па насенняводстве, каранціне і абароне раслін, назіралі за севам рапсу на полі ААТ «Чэрасы». На дзень адчыненых

дзвярэй скіраваліся ў акадэмію ветэрынарнай медыцыны ў Віцебск. Атрымалі кансультацыі па пытаннях паступлення і заключэння мэтавых дагавораў, азнаёміліся з асаблівасці навучання ў вну. Наведалі кафедру паразіталогіі і інвазіўных хвароб жывёл, жывы куточак кафедры заалогіі, прайшлі майстар-клас па кіналогіі.

Вучні аграгрупы ўдзельнічалі ў конкурсах аграрнай скіраванасці. Іх «АграКЛАСная» газета заняла першае месца. Паспрабавалі свае сілы ў абласной алімпіядзе «Аграполія», пабывалі на абласным аграфоруме «За моладдзю – будучыня». У школе дзеці вырошчвалі памідоры, даглядалі пакаёвыя расліны і клумбы.

У новым навучальным годзе заняткі па профілі прадоўжацца.

Алена КРАСОЎСКАЯ, 
намеснік дырэктара па выхаваўчай рабоце.
Фота для ілюстрацыі.