Найлепшая інвестыцыя – інвестыцыя ў сябе. Перш-наперш – ва ўласнае здароўе. Гэта актуальна ў любым узросце. Як падтрымліваць сваё самаадчуванне на ўзроўні камфортнага, наведвальнікам аддзялення дзённага знаходжання для грамадзян пажылога ўзросту і суправаджальнага пражывання ТЦСАН расказала ўрач-тэрапеўт дзённага стацыянара раённай паліклінікі Крысціна ЧАРНЯЎСКАЯ. Паслухаць доктара прыйшлі і супрацоўнікі ўстановы.

Урач расказала пра дзейнасць дзённага стацыянара, дзе ў тым ліку праходзяць курсы рэабілітацыі пацыенты з хранічнымі захворваннямі. Каб сюды трапіць, перш-наперш трэба наведаць свайго ўчастковага ўрача. Затым прызначае курс лячэння ўрач-тэрапеўт дзённага стацыянару, вызначыўшы разам з пацыентам працэдуры і прэпараты. Лекавыя сродкі, па жаданні, можна набываць самастойна. Прапануюць фізіяпрацэдуры. На працягу курса масаж бясплатны, пасля можна прадоўжыць на платнай аснове. Праводзяць у дзённым стацыянары метабалічную тэрапію, займаюцца прафілактыкай захворванняў, якія выклікае цукровы дыябет, прымаюць пацыентаў з варыкозным расшырэннем вен і так далей.

Нагадала Крысціна Чарняўская пра неабходнасць медаглядаў. Выяўленае на ранняй стадыі захворванне дае куды больш шанцаў на папраўку. У посткавідны перыяд сачыць за сваім здароўем асабліва важна. Пандэмія пачынае адгукацца рэхам іншых выкліканых каронавірусам хвароб. Узнікаюць новаўтварэнні на лёгкіх, выяўляюцца анкалагічныя захворванні нават у тых, хто вядзе здаровы лад жыцця. Жанчынам абавязкова сачыць за станам малочных залоз. Часта непакоіць страўнік – трэба неадкладна абследавацца. Ачагом розных захворванняў становяцца хворыя зубы, таму не варта праходзіць міма стаматалагічнага кабінета.

Размова з урачом насіла характар нязмушанага ажыўленага дыялогу.  Адказваючы на пытанні аўдыторыі, Крысціна Іосіфаўна нагадала пра ўмеранасць фізічнай актыўнасці ў сталым узросце. Для зніжэння нагрузкі на суставы раіла дома і ў двары хадзіць з кіем. Яшчэ адзін варыянт – палкі для скандынаўскай хады. І модна, і зручна, і карысна. Настойліва рэкамендавала не прымяняць у якасці снатворнага «Карвалол»: сродак выклікае залежнасць. Лепш замяніць на валяр’янку ці сардэчнік (рус. пустырник) або выпіць гарбаты з мяты ці мелісы. Для здаровага сну пажадана класціся спаць і прачынацца ў адзін і той жа час. Не варта ў ложку аналізаваць пражыты дзень і будаваць планы на наступны, лепш зрабіць гэта да таго, як схавацца пад коўдру.

Што да харчавання ў сталым узросце, урач рэкамендуе аддаваць перавагу дробным і частым прыёмам ежы. У меню акцэнты на вітамінах, стравах запечаных ці прыгатаваных на пары. Строгая дыета прывядзе да дэпрэсіі, таму можна дазваляць сабе любімыя ласункі. Зноў жа – усё індывідуальна і ў меру.

На развітанне доктар нагадала пра яшчэ адзін складнік здароўя – любіць сябе і радавацца кожнаму дню. 

КАМЕНТАРЫЙ
Ганна ЛІСКОВА, загадчык аддзялення дзённага знаходжання для грамадзян пажылога ўзросту і суправаджальнага пражывання ТЦСАН:
– У рамках Нацыянальнай стратэгіі «Актыўнае даўгалецце – 2030» ладзім разнастайныя мерапрыемствы для наведвальнікаў аддзялення, якія садзейнічаюць актыўнаму вольнаму часу, здароваму ладу жыцця, асобаснаму развіццю пажылых людзей. Нядаўна сумесна з удзельнікамі раённай ветэранскай арганізацыі і Савета пажылых грамадзян ладзілі турніры па шашках і шахматах (на фота). Прахо- дзілі майстар-класы па вырабе сувеніраў з гліны і роспісе святочных пернікаў, азнаёміліся з арт-тэрапіяй. З экскурсіямі наведаліся ў раённы аддзел па надзвычайных сітуацыях, на выратавальную станцыю, у аддзяленне аховы. Прынялі ўдзел у абрадзе «Гуканне вясны», які ладзілі нашы сябры з клуба «Суседачкі» Чэраскага СДК. Таксама ў аддзяленні дзейнічае кол-цэнтр: трымаем сувязь з пажылымі жыхарамі горада і раёна, аказваем ім псіхалагічную падтрымку і, па магчымасці, дапамагаем з бытавымі клопатамі.

Кацярына РЫНКЕВІЧ.
Фота Казіміра БЛАЖЭВІЧА.