Здымка з паветра выглядае эфектна. Але ў Беларусі выкарыстанне квадракоптараў пагражае сур’ёзнай юрыдычнай адказнасцю. Прававыя нюансы выкарыстання беспілотнікаў патлумачыў участковы інспектар міліцыі Міхаіл Чаравуха:

– Указам № 297 з канца сакавіка 2024-га фізічным асобам забаронена: увозіць у краіну дроны, захоўваць іх, выкарыстоўваць для здымкі (у тым ліку вяселляў), прадаваць ці вырабляць беспілотнікі і авіямадэлі.

Супрацоўнікі мытных органаў правяраюць наяўнасць у міжнародных паштовых адпраўленнях і таварах укладанняў, якія маюць адносіны да грамадзянскіх беспілотнікаў і авіямадэляў. Гэта як самі апараты, так і запчасткі да іх.

Выкарыстоўваць для здымкі беспілотнікі аператары маюць права толькі пры выкананні наступных умоў: калі прайшлі спецнавучанне, апарат зарэгістраваны ў Дэпартаменце па авіяцыі Мінтранса, на яго корпус нанесены рэгістрацыйны нумар і ідэнтыфікацыйная пазнака, заключаны дагавор з РУП «Белаэранавігацыя», атрыманы дазвол у Генштабе Узброеных Сіл. Пры ажыццяўленні здымкі на вышыні да 1 850 метраў у межах гарадоў неабходна ўзгадніць палёт з мясцовымі выканаўчым камітэтам і органам унутраных спраў, атрымаць дазвол на кожны канкрэтны палёт, інфармаваць пра яго пачатак і заканчэнне цэнтр Адзінай сістэмы арганізацыі паветранага руху. Нельга кіра- ваць дронам у стане алкагольнага ап’янення.

За незаконныя ўвоз, захоўванне, выраб, абарот беспілотнікаў і авіямадэляў, а таксама запуск і здымку прадмет правапарушэння могуць канфіскаваць і накласці штраф: для фізічных асоб – да 30 базавых велічынь, для ІП – ад 30 да 100 БВ, для юрыдычных асоб – ад 50 да 100 базавых. Паўторныя парушэнні на працягу года прывядуць да крымінальнай адказнасці.