Часта насельніцтва цікавіцца, якім чынам можна набыць жыллё або палепшыць свае ўмовы пражывання, калі ўжо мае яго ва ўласнасці. За тлумачэннямі рэдакцыя звярнулася да намесніка старшыні райвыканкама Яўгена НІКАЛАЁНКА.

– Для правядзення капітальнага рамонту і рэканструкцыі жылых памяшканняў, будаўніцтва інжынерных сетак, у тым ліку электразабеспячэння жылога дома, узвядзення гаспадарчых памяшканняў і пабудоў, павышэння ўзроўню эстэтычных якасцей жылых памяшканняў грамадзяне ўправе скарыстацца ільготным крэдытам на ўмовах Указа № 75 ад 7 лютага 2006 года. Выдаюць яго ўласнікам жылля, якія пастаянна пражываюць і працуюць у населеных пунктах з колькасцю насельніцтва да 20 тысяч чалавек.

Сярэднямесячны сукупны даход за год на кожнага члена сям’і не павінен перавышаць 1 168,59 рублёў. Максімальныя тэрміны карыстання крэдытам складаюць дзесяць гадоў пад 3 % гадавых, сума – 90 % кошту выдаткаў, вызначаных праектна-каштарыснай дакументацыяй, але не больш за 11,1 тысячы рублёў.

Грамадзяне, што стаяць на ўліку маючых патрэбу ў паляпшэнні жыллёвых умоў, маюць права на атрыманне дзяржаўнай падтрымкі ў выглядзе субсідыі на будаўніцтва ці рэканструкцыю жыллёвых памяшканняў, згодна з Указам № 240 ад 4 ліпеня 2017 года. Тэрмін карыстання крэдытам складае да 20 гадоў, працэнтная стаўка для жыхароў Міёршчыны – 5 %, для шматдзетных сем’яў – 1 %. Сума вызначаецца, зыходзячы з нарматыву кошту м² жылля. Па стане на 1 студзеня, ён складае 1 017 рублёў.

Напрыклад, для сям’і з чатырох чалавек сума крэдыту разлічваецца наступным чынам: 4 чалавекі х 20 м² х 1 017 рублёў х 90 % = 73 224 рублі. Штомесячны плацеж складзе 627,67 рубля. Для шматдзетнай сям’і з пяці чалавек гэта будзе адпаведна 101 700 рублёў і 107,15 рубля адпаведна.

Шматдзетныя сем’і, якія стаяць на ўліку маючых патрэбу ў паляпшэнні жыллёвых умоў, могуць скарыстацца дзяржаўнай падтрымкай і на набыццё жылля, згодна з указам № 13 ад 6 студзеня 2012 года. Тэрмін выплаты крэдыту складае да 40 гадоў пад 1 % гадавых.

Для тых, хто не мае патрэбы ў паляпшэнні жыллёвых умоў, ААТ «ААБ Беларусбанк» прадстаўляе крэдыты на будаўніцтва, рэканструкцыю ці набыццё жылых памяшканняў тэрмінам да 20 гадоў, на набыццё і будаўніцтва дачы, садовага доміка, домакамплекта – да 12-ці. Па сістэме будаўнічых зберажэнняў магчыма ўзвесці ці набыць жылое памяшканне ў любым населеным пункце Беларусі. Каб стаць яе ўдзельнікам, неабходна адкрыць уклад і назапасіць 25 % на працягу выбранага тэрміну: трох, пяці ці сямі гадоў. Яго можна скараціць, унесці гэтую суму ў першы месяц захоўвання і атрымаць крэдыт праз 19 месяцаў.

Больш падрабязную інфармацыю па ільготным крэдытаванні прадаставяць у аддзеле архітэктуры і будаўніцтва, жыллёва-камунальнай гаспадаркі ў кабінеце № 23 райвыканкама або па нумары 5 19 03. Пракансультуюць па гэтым пытанні ў ААТ «Беларусбанк».