Аднойчы для бібліятэчнай кнігі настае момант пакінуць паліцу. Пажаўцелі зачытаныя старонкі, страціла прывабнасць вокладка, перастаў быць актуальным змест. Новае жыццё старым кнігам дорыць бібліятэкар Міёрскай дзіцячай бібліятэкі Ала Грэцкая. У руках майстрыцы яны ператвараюцца ў адметны дэкор.

Была кніга – стаў торт. Ці сэрцайка. Або букет кветак. На дэкаратыўным стэндзе ў чытальнай зале дванаццаць кніг, чые складзеныя ў пэўнай паслядоўнасці старонкі ўтварылі розныя кампазіцыі. Такі падарунак Ала Грэцкая змайстравала з нагоды 75-годдзя дзіцячай бібліятэкі. Так ва ўстанове з’явілася яшчэ адна арыгінальная фотазона, якую майстрыца плануе дапоўніць іншымі цікавымі элементамі.

Вяртаецца на стэлажы ў новых вобразах спісаная літаратура. Паўлін, елачка, ваза з кветкамі і іншы дэкор аздабляе паліцы.

– Стварэнне аб’ёмных кампазіцый з кніг называецца букфолдынгам. Паспрабавала гэты занятак – захапілася, – заўважае суразмоўніца. – Хочацца напаўняць крэатывам прастору бібліятэкі.

На абанеменце сустракае наведвальнікаў Берагіня кніг. Многія з ёй фатаграфуюцца. Фігуру жанчыны ў рост чалавека Ала Рыгораўна спляла з газетных трубачак. Гэтым відам дэкаратыўна-прыкладной творчасці займаецца каля дзесяці гадоў. Для сябе стварае рэчы практычныя: дома кухонная тэхніка, гародніна захоўваюцца ў плеценых каробках.

Рабочае месца аздоблена дэкаратыўнымі вырабамі. Хатка Бабы-Ягі, карэта Папялушкі, замак з вежамі і іншыя казачныя матывы прыцягваюць увагу маленькіх і дарослых чытачоў.
– Пастаяннае прымяненне знайшла шкатулка ў выглядзе Змея Гарынавіча. Запаўняем яе ласункамі, якімі частуем дзяцей падчас мерапрыемстваў. Малыя радуюцца і здзіўляюцца: Змей Гарынавіч цукеркі раздае, – усміхаецца бібліятэкар.

Майстар-класы па розных відах дэкаратыўна-прыкладной творчасці Ала Рыгораўна праводзіць для наведвальнікаў дзіцячага клуба «Фантазія», што дзейнічае ва ўстанове. Замест гаджатаў дзеці бяруць падручныя матэрыялы і ствараюць з іх разнастайны дэкор. Кніга-складанне падчас экскурсіі ў бібліятэцы паспрабавалі наведвальнікі аддзялення дзённага знаходжання для пажылых грамадзян ТЦСАН. Занятак зацікавіў, вынік задаволіў.

Як заўважае Ала Грэцкая, ёй не трэба чакаць натхнення, каб сесці за справу. Галоўнае, знайсці час, а ідэі і жаданне ёсць заўсёды.