Другі рэспубліканскі маладзёжны жаночы форум «Жаночая энергія для вялікай справы» прайшоў у Мінску і сабраў каля 200 удзельніц ва ўзросце ад 18 да 31 года. Ён скіраваны на раскрыццё патэнцыялу беларусак, фарміраванне пазітыўнага погляду на сям'ю і дзяцей, падтрымку ў пытаннях сямейнага дабрабыту. Мерапрыемства стала пляцоўкай для адкрытага дыялогу, абмену вопытам і генерацыі новых ідэй.

Ключавой падзеяй стала ўрачыстае адкрыццё форуму і адкрыты дыялог са Старшынёй Савета Рэспублікі Нацыянальнага сходу Рэспублікі Беларусь Наталляй Качанавай, старшынёй Беларускага саюза жанчын Вольгай Шпілеўскай. Работа прадоўжылася ў трох тэматычных секцыях: па захаванні жаночага здароўя, па энергіі лідарства і па мацярынстве.
Уражаннямі падзялілася інжынер па лесакарыстанні Дзісненскага лясгаса Ганна Васюцёнак:

– Самае вялікае ўражанне зрабіла на мяне Наталля Іванаўна. Яна настолькі ўпэўненая ў сабе, так прыгожа сябе трымала, гаварыла. Гэта было цікава і зачаравальна. Яна акутала сваёй аўрай усю залу.

Акрамя таго, выступалі прадстаўніцы розных сфер: улады, а таксама выкладчыкі, псіхолагі. Мы шмат даведаліся пра жаночае здароўе. Спадабаўся высокі ўзровень падрыхтоўкі мерапрыемства. Я пазнаёмілася з дзяўчатамі з нашай і іншых абласцей, абмяняліся кантактамі.

Калі апісаць сустрэчу ў некалькіх словах: карысна, цікава, уражвальна. Зрабіла для сябе вынікі і паставіла мэты, якіх хачу дасягнуць. Разумею, што для гэтага патрэбна шмат працаваць, каб як нашы спікеры ўражваць, заварожваць, умець паставіць сябе і весці дыялог з людзьмі.

Падрыхтавала Алена ВАРОНІНА.