Дырэктар раённага Цэнтра дзяцей і моладзі Валянціна Мітрафанава ніколі не бачыла сябе на кіраўнічай пасадзе. Між тым 21 год узначальвае ўстанову дадатковай адукацыі. Атмасфера творчасці, калектыў аднадумцаў, фантан ідэй – яе паўсядзённасць.

Пераважыла педагогіка

Педагогіка ці медыцына? Класічныя вагі ў выбары прафесіі для школьніц сярэдзіны 80-х. Блізкія прарочылі Валянціне белы халат. Пераважыла педагогіка.

– Дзе нарадзіўся, там і згадзіўся. Гэта пра мяне, – адзначае суразмоўніца. – Міёры – мой родны горад. Скончыла ў 1985 годзе СШ № 1 і адразу пайшла працаваць старшай важатай у Паташнянскую базавую школу. Вышэйшую адукацыю атрымлівала завочна ў Віцебскім педінстытуце.

У Валянціны Мітрафанавай дыплом настаўніка матэматыкі. Гэты прадмет быў у любімчыках з пачатковых класаў. З цеплынёй прыгадвае сваю настаўніцу Ганну Пятроўну Звераву. Сама ж вяла матэматыку ў СШ № 3, калі трэба было замяніць кагосьці з педагогаў.

– Адпрацаваўшы год у Паташні, перайшла ў СШ № 3, дзе з’явілася вакансія старшай важатай. Пасля гэтую пасаду перайменавалі ў педагога-арганізатара, – удакладняе.

Новая старонка ў працоўнай біяграфіі адгарнулася ў 2003 годзе. Прапанавалі работу метадыста ў Доме дзіцячай творчасці (ранейшая назва ЦДМ). Праз два гады ўзначаліла ўстанову.

Калегі разумеюць з паўслова

Як заўважае Валянціна Мітрафанава, яе стыль кіравання – дэмакратычны. Пра свой калектыў гатова гаварыць доўга.

– Добра быць кіраўніком, калі ў цябе каманда аднадумцаў. Калегі мяне з паўслова разумеюць. Ведаю: яны не падвядуць, – падкрэслівае. – Люблю працаваць з моладдзю. Лёгка знаходзім агульную мову.

У гэтым навучальным годзе ў ЦДМ дзейнічаюць 44 гурткі. У тым ліку ў філіяле ў Дзісне, які стаў структурнай часткай установы дадатковай адукацыі ў 2011-м. Працуюць гурткі ў школах. Напрыклад, футболам займаюцца ва Узмёнскай БШ, турызмам і спартыўным арыенціраваннем, валейболам – у Дзісненскай СШ імя М. Кузьміна.

Дэкаратыўна-прыкладны, тэхнічны, экалагічны, гульнёвы – па гэтых і іншых накірунках дзейнічае ЦДМ. Распачаў работу музычны тэатр. Групу юных акцёраў педагог Аксана Аляксеева набрала з лёгкасцю. Яшчэ ў ліпені сфарміраваліся групы ў школе ранняга развіцця, дзе праводзіць заняткі Вераніка Шамінка. Запатрабавана робататэхніка, чым займаецца з дзецьмі педагог Надзея Ра- дзькова. Дарэчы, сёлета яна ўвайшла ў першую дзясятку сярод удзельнікаў Міжнароднай алімпіяды па крэатыўным праграмаванні Scratch-2026.

– Нацэльваю педагогаў на пастаяннае самаразвіццё. Рэкамендую атрымліваць вышэйшую адукацыю, бо лічу гэта важным, – адзначае кіраўнік. – Падрыхтоўцы да заняткаў педагогі надаюць шмат увагі. Дзеці прыходзяць сюды не таму, што трэба, а таму што хочацца. Кожны навучэнец для нас – талент, якому дапамагаем раскрыцца.

Высокая ацэнка – заслуга калектыву

Акрамя гуртковай дзейнасці ЦДМ актыўнічае ў конкурсах. За мінулы навучальны год работы навучэнцаў установы атрымалі 22 узнагароды на раённым, 30 на абласным і тры на рэспубліканскім этапах разнастайных конкурсаў.

Нядаўна па ініцыятыве Цэнтра дзяцей і моладзі ў раёне прайшоў конкурс краязнаўчых календароў. Установы адукацыі здзівілі работамі, прадстаўленымі ў намінацыях «Гераіні побач. Жанчыны майго краю» і «Духоўная спадчына малой радзімы».

– Ідэй заўсёды шмат. Штораз абмяркоўваю іх з калегамі, – заўважае Валянціна Анкудзімаўна.

Адпачынак для кіраўніка – паездкі да блізкіх, гістарычная літаратура, інфармацыйна-аналітычныя тэлеперадачы.

За 41 год у педагогіцы Валянціну Мітрафанаву не раз адзначалі ўзнагародамі раённага, абласнога, рэспубліканскага ўзроўняў. Чарговая ацэнка – партрэт дырэктара ЦДМ занесены на раённую Дошку гонару.

– Гэта заслуга ўсяго калектыву. Свой унёсак зрабіў кожны: ад тэхнічных работнікаў да намесніка дырэктара, – падкрэслівае Валянціна Анкудзімаўна. – Са мной працуюць людзі, улюбёныя ў сваю справу. Мы не стаім на месцы, працягваем развівацца, імкнёмся да найлепшага.