Падведзены вынікі раённага конкурсу творчасці інвалідаў “Цуды ўмелых рук”. Ён праводзіцца ў другі раз, сёлета ўдзельнічалі 15 чалавек. Здзівілі фантазіяй і парадавалі талентамі. Вызначыць пераможцаў было складана, таму кожнаму прысудзілі асобную намінацыю.
“Стварэнне” — работы Людмілы Бакевіч. Яна займаецца ў гуртку пры тэрытарыяльным цэнтры сацыяльнага абслугоўвання насельніцтва. Падабаецца тварыць з гліны і кардону.
Кацярына Дзіянава і Дзмітрый Васюцёнак. Хлопец стаў наведваць аддзяленне нядаўна. Творчы і таленавіты. У работах маці і сына прасочваецца цішыня і супакой, загадкавасць. Іх намінацыя — “Космас”.
“Сапраўдным мастаком” прызналі Дзмітрыя Віткоўскага. Малады чалавек — галоўны пейзажыст і жывапісец аддзялення. Яго часта бачаць на вуліцах горада з вялізнымі ватманамі, рукзакамі з фарбамі. Бярэ, так бы мовіць, маштабам. А яго карціны — родныя краявіды, храмы Беларусі — бачны здаля.
Сафія Гуз адзначана ў намінацыі “Творчае майстэрства”. Вачыма не бачыць, свае ўнікальныя работы стварае сэрцам. Праяўляе сябе ў розных тэхніках: бісерапляценне, пляценне з газетных трубачак, кераміка і іншыя.
Людміла Гугала ў конкурсе ўдзельнічае другі раз. Прадставіла вырабы, вязаныя кручком. Перамагла ў намінацыі “Вельмі ўмелыя ручкі”.
Наталля Дубік цікавіцца керамікай. Стварыла “Лепшую аўтарскую работу”. Цяпер знаходзіцца на адаптацыі ў цэнтры рабочым зялёнага будаўніцтва. Працуе ў цяпліцы.
“Паштоўку года” прадставіла Алена Дарожка. Працавітая і старанная, дапамагае маці па гаспадарцы. “Кавалачак лета”, — так ахарактарызавалі яе работу.
Максім Жугар атрымаў намінацыю “Яркі жывапіс”. Таксама аддае перавагу вялікім фарматам. Вывучае колеры і іх спалучэнні, якія ўдала выкарыстоўвае ў сваіх карцінах. Стварае работы з прыродных матэрыялаў і кардону. Сёлета яго макет— сядзібу Рэпіна Здраўнёва — прадстаўлялі на абласным конкурсе.
Васіль Кайнараў захапляецца маляваннем сцягаў розных краін. Яго намінацыя — Вакол свету”. Галоўнае пажаданне — пабываць у тых месцах, сімволіку якіх стварае.
Намінацыя “Міс крэатыў” прысуджана Анастасіі Кулянок. Пра такіх кажуць “спартсменка, камсамолка і проста прыгажуня”. Насця спявае, спрабуе свае сілы ў кераміцы, дапамагае работнікам аддзялення.
“Міс стараннем” назвалі Дзіяну Мельнікаву. Адкрытая і вясёлая дзяўчына наведвае гурткі ў цэнтры, выпраменьвае пазітыў і станоўчую энергію. Лепіць работы з гліны і любіць іх размалёўваць.
Ірэна Марціноўская ўдзельнічае ў конкурсе ўпершыню. “Часцінка душы” — так названы яе вязаныя рэчы. Ірэна — сапраўдны дызайнер адзення.
Званне “Таленавіты кераміст” заслужыў Юрый Савуць. Прыходзіць у аддзяленне кожны дзень, не прапускае заняткі. Сваімі рукамі рыхтуе гліну для ўсіх аматараў лепкі.
Дыпломам “Фотамастака” адзначаны Сяргей Сушко. Яго друкаваная прадукцыя — календары, буклеты, візітныя карткі — стала брэндам тэрытарыяльнага цэнтра сацыяльнага абслугоўвання насельніцтва.
— Вялікі дзякуй за смеласць, зацятасць і карпатлівую працу.
Прыемна, што дзеліцеся часцінкай сваёй душы.
Жадаю моцнага здароўя, невычэрпнага энтузіязму і новых ідэй,
— віншавала ўдзельнікаў арганізатар конкурсу Наталля Пяткевіч.
Фотаматэрыял Казіміра БЛАЖЭВІЧА.
Алена ПЛЕХТАН,
інструктар па працатэрапіі ТЦСАН.
