Патэнцыял Прыдзвіння ў сферы падрыхтоўкі кадраў прадэманстравала прэс-канферэнцыя па асаблівасцях уступнай кампаніі – 2023. Яе арганізаваў Медыяцэнтр Віцебскай вобласці сумесна са сталічным Домам прэсы, а ўдзельнікамі сталі прадстаўнікі ўсіх пяці дзяржаўных вну Віцебшчыны, а таксама кіраўнікі шэрагу каледжаў Віцебска і Оршы.

Начальнік галоўнага ўпраўлення па адукацыі аблвыканкама Дзмітрый Хома заўважыў, што фармат уступнай кампаніі змяніўся. У першую чаргу гэта мае дачыненне да магчымасцей для абітурыентаў. Між тым, моцныя кадры – гэта моцныя рэгіёны. Віцебшчына ў поўным аб’ёме забяспечвае кадрамі прадпрыемствы і арганізацыі розных галін эканомікі, сацыяльнай сферы. Сёлета плануецца прыняць каля 4,5 тысячы студэнтаў на ўзровень вышэйшай адукацыі, з іх прыкладна 2,7 тысячы будуць вучыцца за кошт бюджэту. Вялікая ўвага надаецца мэтавай падрыхтоўцы кадраў.

Завяршыліся цэнтралізаваныя экзамены, іх вынікі будуць улічвацца пры падачы дакументаў у вну разам з вынікам цэнтралізаванага тэсціравання. Дзмітрый Хома адзначыў, што з прадметаў па выбары найбольшай папулярнасцю ў выпускнікоў карысталіся матэматыка, якую здавалі звыш 2 тысяч чалавек, біялогія – больш за 1 тысячу. У той жа час англійскую мову і гісторыю Беларусі, напрыклад, выбралі 587 і 573 школьнікі адпаведна.

Уступная кампанія набірае абароты. Пачалася яна з абласнога і заключнага этапаў рэспубліканскай алімпіяды па вучэбных прадметах і ўніверсітэцкай. Іх пераможцы маюць льготы пры паступленні, а многім засталося толькі падаць дакументы ў прыёмную камісію.

На ўніверсітэцкіх алімпіядах ПДУ імя Еўфрасінні Полацкай атрымалі дыпломы 54 удзельнікі. З пачатку чэрвеня яны могуць падаваць дакументы. Ужо ў сакавіку атрымалі запрашэнне стаць студэнтамі звыш 60 пераможцаў алімпіяд Віцебскага дзяржаўнага медыцынскага ўніверсітэта. Прымуць нямала таленавітых студэнтаў і ў педагагічным.

Па словах Дзмітрыя Хомы, неабходна выпрацоўваць індывідуальную траекторыю навучання для кожнага школьніка, каб ён змог зрабіць усвядомлены прафесійны выбар. Сёння сістэма адукацыі імкнецца адсочваць патрэбы эканомікі і ўносіць адпаведныя змяненні ў структуру падрыхтоўкі кадраў. Згодна з гэтым, уводзяцца новыя спецыяльнасці ў вну і каледжах. Чакаюць змяненні і ў прафесійна-тэхнічнай адукацыі.

Пашыраецца сфера завочнага навучання, што дазволіць работнікам павышаць сваю прафесійную кваліфікацыю. Таксама студэнтам прадастаўляюцца шырокія магчымасці для даследчай дзейнасці, адпрацоўкі практычных навыкаў, умовы для творчай самарэалізацыі і заняткаў спортам.

Алена ВАРОНІНА.
Фота для ілюстрацыі.