Выстава дасягненняў суверэннай Беларусі «Мая Беларусь» з 19 снежня па 23 лютага праходзіць у Мінску. Маштабны культурна- асветніцкі праект дазваляе па-новаму паглядзець на нашу краіну, яе шлях і будучыню. На працягу тыдня знаёмілі гасцей выставы з турыстычным патэнцыялам Міёрскага раёна прадстаўнікі турінфацэнтра.
– «Мая Беларусь» – гэта не проста выстава, гэта падарожжа па краіне! Мноства экспазіцый аб’ядноўваюць сучасныя тэхналогіі, візуальныя інсталяцыі і рэальныя дасягненні ў самых розных сферах: ад індустрыі і навукі да культуры і турызму, – апісвае выставу дырэктар турыстычнага інфармацыйнага цэнтра Міёрскага раёна Алена Жук. – Нашай задачай было не проста расказаць аб прыгажосці і магчымасцях Міёршчыны, але і натхніць наведвальнікаў выставы на падарожжа ў наш унікальны куточак Беларусі.
Важнасць праекта для краіны і яго ролю ў фарміраванні пазітыўнага іміджу Беларусі як сучаснай дзяржавы, якая развіваецца, падкрэсліў візіт Прэзідэнта Аляксандра Лукашэнкі.
Стэнд Міёрскага раёна прыцягваў увагу шматлікіх наведвальнікаў. З захапленнем знаёміліся з нашым краем, вывучалі славутасці, будавалі планы падарожжаў па турыстычных маршрутах, удзельнічалі ў інтэрактывах.
– Традыцыйна інтарэс выклікала балота Ельня, а цяпер яшчэ сталі цікавіцца вадаспадам і горадам Дзісна. Здзіўляліся, што ў Дзісне ёсць паром (у Беларусі іх усяго каля 20, прычым большая частка закансервавана) і стогадовы мост. Пыталіся пра дзісненскі музей і яго экспазіцыі, – дзеліцца суразмоўніца.
Па словах Алены Жук, добра разыходзіліся інфармацыйныя буклеты. У адной з гульняў, сэнс якой суаднесці названыя па-беларуску прадметы з карцінкай, удзельнічалі іншаземцы. Паспяхова – угадалі амаль усё. Хто зусім не знаёмы з беларускай мовай, бралі карты Міёрскага раёна на англійскай.
Выстава стала пляцоўкай для знаёмстваў як з дасягненнямі нашай краіны, так і з калегамі з іншых рэгіёнаў, абмену вопытам. Прадстаўлялі развітыя накірункі. Напрыклад, брэсцкія спецыялісты рабілі акцэнт на гісторыка-культурны турызм. Міярчане пазіцыяніравалі экалагічны.
Мерапрыемства праходзіла ў актыўным рэжыме, часу на адпачынак амаль не было. Разам з тым паспелі крыху азнаёміцца з экспазіцыямі. Уразілі землякоў вялікагрузная тэхніка і робататэхніка, ацанілі хлебабулачныя вырабы віцебскіх вытворцаў. Адчулі гордасць за сваю краіну, свой рэгіён і яго жыхароў.
– Мне б хацелася больш пахадзіць, а каб разгледзець усё і тым больш па- ўдзельнічаць – на гэта спатрэбіцца цэлы дзень, – заўважыла Алена Жук.
Падрыхтавала Алена ВАРОНІНА.
Фота прадаставіў турінфацэнтр.
