Брыгада Міёрскага раёна газазабеспячэння другі год запар лідзіруе ў рэспубліканскім аглядзе-конкурсе прафмайстэрства.

Сем каманд – пераможцаў рэгіянальных і абласных аглядаў-конкурсаў – спаборнічалі ў Бабруйску на званне «Найлепшай брыгады па тэхнічным абслугоўванні газавыкарыстоўваючага абсталявання». УП «Віцебскаблгаз» прадстаўлялі міёрскія газавікі: старшы майстар Уладзімір Максіменка, слесары Юрый Аўласевіч і Сяргей Гайлеш. Яны ў шосты раз абаранялі гонар Віцебшчыны на рэспубліканскім узроўні. Дэбютавалі ў 2012-ым – занялі шостае месца з сямі. У 2016 годзе зноў апробавалі свае сілы. З таго часу каманда з Міёр штогод у ліку пераможцаў. Прычым толькі ў 2017-ым і 2018-ым займалі другое і трэцяе месцы. У астатніх спаборніцтвах не пакідалі іншым удзельнікам шанцаў.

 
Сёлета набралі 95,8 бала і перамаглі. Чарговы раз атрымаў дыплом прафсаюза работнікаў энергетыкі, газавай і паліўнай прамысловасці ў намінацыі «Найлепшы майстар» Уладзімір Максіменка, дыпломам дзяржаўнага вытворчага аб’яднання «Белпаліўгаз» у намінацыі «Найлепшы слесар» адзначаны Сяргей Гайлеш. На другім месцы з 92,6 баламі апынуліся супрацоўнікі УП «Мінскаблгаз». З невялікім адрывам трэцюю прыступку заняла брыгада РУП «Магілёўаблгаз».

 
– Сакрэт поспеху нашай каманды – у згуртаванасці і арганізаванасці. Працуем разам 15 гадоў, стаж кожнага складае звыш 20-ці, – заўважае Сяргей Часлававіч. – Ва УП «Віцебскаблгаз» створаны ўсе ўмовы для дастойнай работы, прафесійнага развіцця і ўдасканалення. Немалаважная падтрымка працоўнага калектыву і сям’і. Раю маладым спецыялістам верыць у сябе і свае сілы. Вопыт і прафесіяналізм прыходзяць з часам.

Алена ВАРОНІНА

Фота прадастаўлена Міёрскім РГЗ.