6 студзеня, напярэдадні Нараджэння Хрыстова, спецыялісты раённага сацыяльна-педагагічнага цэнтра і пастыр евангельскай царквы "Благадаць" Валянцін Гоч арганізавалі каляднае свята для дзяцей са шматдзетных, апякунскіх, прыёмных сем'яў, дзіцячых дамоў сямейнага тыпу. Перад імі выступілі ўжо знаёмыя артысты з Віцебска "ХіміКідс" з новай праграмай "Перазамарозка".  

Зімовае шоу з вясёлымі, бяспечнымі доследамі захапіла публіку. Галоўнай задачай ставілася сфарміраваць цягу да ведаў. Артысты паказалі і даказалі, што навука можа быць вясёлай і займальнай. Нават бацькі прымалі ўдзел у правядзенні доследаў. Вадкі азот умомант ператвараў жывую ружу ў крыштальную. Бананы былі такімі цвёрдымі, што замянялі малаток, і ўдзельнікі пры яго дапамозе без цяжкасці забівалі ў дошку цвікі. Вялікія паветраныя шары, пагружаныя ў азот, адразу станавіліся маленькімі і бясформеннымі, ад цеплыні дзіцячых далоняў зноў набывалі першапачатковую форму. Зала радавалася, апладзіравала! Прафесары лабараторыі доследаў матывавалі ўсіх прысутных на добрыя ўчынкі, паважлівыя адносіны адно да аднаго, на выдатную вучобу. Галоўнае пажаданне—мець светлае сэрца, не афарбоўваць яго ў цёмныя таны дрэннымі ўчынкамі.

І якое свята без падарункаў?! У фінале мерапрыемства іх уручылі ўсім дзецям. Разыходзіліся з цудоўным настроем і радаснымі ўсмешкамі.
За спонсарскую, арганізацыйную дапамогу шчыра дзякуем пастару евангельскай царквы "Благадаць" Валянціну Гочу, дырэктару СШ №2 Уладзіміру Ханецкаму, за захапляльнае прадстаўленне—артыстам кампаніі "ХіміКідс" з Віцебска.

Наталля СЯТКОЎСКАЯ, загадчык

аддзела па рабоце з сям'ёй і дзецьмі

сацыяльна-педагагічнага цэнтра.