Вызначацца з будучай прафесіяй найлепш загадзя і асэнсавана, каб пасля любіць сваю работу. Паўстае выбар і навучальнай установы, дзе дадуць грунтоўныя веды, каб стаць запатрабаваным спецыялістам. Як не памыліцца і знайсці менавіта свой шлях, адзінаццацікласнікам раёна дапамагалі разабрацца прадстаўнікі мясцовых служб, выкладчыкі навучальных устаноў рэспублікі, якія 21 студзеня завіталі на сустрэчу ў СШ № 3 імя Героя Савецкага Саюза Я. Томкі. Госці падрабязна расказалі будучым абітурыентам пра ўмовы паступлення на пэўныя факультэты і аддзяленні, пра магчымасці паспяховага працаўладкавання пасля атрымання дыплома. На экране дэманстраваліся асаблівасці арганізацыі вучэбнай і адпачынкавай дзейнасці ў вну і каледжах.

З году ў год раён адчувае дэфіцыт кваліфікаваных кадраў. А моладзь, як правіла, гэта новыя ідэі і сучасныя падыходы ў рабоце. Цяпер галоўная задача адзінаццацікласнікаў – паспяхова скончыць школу і паступіць. У якасці маладых спецыялістаў іх будуць з радасцю чакаць на малой радзіме. На гэтым акцэнтавалі ўвагу, вітаючы сёлетніх выпускнікоў, начальнік аддзела па адукацыі Аляксандр Жук і начальнік арганізацыйна-кадравай работы райвыканкама Наталля Густава. Адзначылі, што на Міёршчыне ёсць належныя ўмовы для прафесійнага развіцця і хуткага кар’ернага росту. Не варта адмаўляцца ад размеркавання, бо першыя два гады маладыя спецыялісты атрымліваюць істотную матэрыяльную падтрымку – надбаўку да заробку, могуць скарыстацца льготным крэдытам. Рэальна атрымаць арэнднае жыллё.

Нагадалі, што нашмат павялічвае шанцы паступлення ў вну заключэнне мэтавых дагавораў з працадаўцамі, зацікаўленымі ў той прафесіі, на якую выпаў выбар вучня. Пры гэтым абітурыент мае магчымасць вучыцца бясплатна і месца работы пасля выпуску яму гарантавана.

Наталія СТАНКЕВІЧ.

Фота Казіміра БЛАЖЭВІЧА.

Падрабязней - у апошнім нумары газеты.