З 1 верасня ва ўстановах адукацыі рэспублікі стане абавязковым другі элемент школьнай формы. Што гэта будзе і як ставяцца да новаўвядзення, спыталі ў педагогаў і бацькоў.

Уладзіслаў КАШКУР, начальнік аддзела па адукацыі райвыканкама:
– На працягу мінулага навучальнага года ўстановы адукацыі раёна вялі падрыхтоўку да ўвядзення з 1 верасня 2023-га другога элемента адзення. Праходзілі агульнашкольныя і класныя бацькоўскія сходы, дзе з улікам меркаванняў усіх удзельнікаў адукацыйнага працэсу – бацькоў і вучняў – у кожнай установе выбралі адзіную школьную форму. Асноўнае патрабаванне – дзеці абавязаны прытрымлівацца  дзелавога стылю адзення.

Ва ўсіх установах адукацыі вызначыліся з другім элементам. Для дзяўчынак у сямі школах гэта будзе блузка пэўнага колеру, у трох – спадніца і яшчэ ў адной – гальштук. Для хлопчыкаў у трох установах адукацыі аддалі перавагу кашулі, у сямі – штанам і ў адной – гальштуку.

Камізэлькі застаюцца першым адзіным элементам, у асноўным іх набываюць цэнтралізавана. Напрыклад, у трох гарадскіх школах – СШ № 2 імя М. Ізварына, СШ № 3 імя Я. Томкі і Дзісненскай СШ імя М. Кузьміна, а таксама ў Сіцькоўскай БШ і Чапукоўскай СШ.

Адрозным знакам у дзесяці школах з’яўляецца значок, для дзісненскіх вучняў зрабілі заказ на 149 нашывак.

Такім чынам, у сямі ўстановах адукацыі  двума школьнымі элементамі для дзяўчынак стануць камізэлька і блузка, а для хлопчыкаў – камізэлька і штаны. Яшчэ ў трох аддалі перавагу камізэльцы і спадніцы, кашулі і камізэльцы адпаведна. У Чапукоўскай школе гэта будуць камізэлька і гальштук.

Алена ПАЎЛОЎСКАЯ, дырэктар Павяцкай СШ імя В. Бабічава:
– Патрабаванні да знешняга выгляду вучняў вызначаны Правіламі ўнутранага распарадку. Згодна з імі, адзіная школьная форма падраздзяляецца на паўсядзённую, святочную і спартыўную. Колер першых дзвюх – чорны, без малюнкаў. У камплект для хлопчыка ўваходзіць трыкатажная камізэлька, штаны, кашуля белая або пастэльных таноў, туфлі і значок. У будні дапускаецца насіць вадалазкі, у святы абавязковая белая кашуля.

Для дзяўчынак патрабаванні тыя ж, у камплекце дадаткова спадніца, а таксама блузка замест кашулі.
Заказалі значкі, а таксама камізэлькі з эмблемамі, іх павінна прывезці ААТ «Палескі трыкатаж». Спадзяюся, да 1 верасня будзем укамлектаваны ўсім неабходным.

Мяркую, школьная форма – правільнае рашэнне. Зрабіла гэты вывад 12 мая на ўрачыстасці па прысваенні школе імя Героя Савецкага Саюза Віктара Бабічава. У адзіным стылі дзеці выглядалі вельмі прывабна. Гэта дысцыплінуе, стварае атмасферу свята.
Будзе дзейнічаць дрэс-код і ў адносінах да педагогаў. Яны павінны выглядаць годна, таму ў прыярытэце строгі класічны стыль.

Вольга ТАБОЛА, маці дзвюх школьніц, г. Дзісна:
– У нашай школе ўжо ў мінулым годзе насілі шэрыя камізэлькі, сёлета дадаліся эмблемы. Іх прывязуць цэнтралізавана. Наконт астатняга пакуль не ведаю. Калі збяромся ў Полацк або Наваполацк, дзе звычайна купляем форму, патэлефаную настаўніцы, каб даведацца пра патрабаванні. Чакаем школьных кірмашоў, штосьці са школьнага адзення пяройдзе ад старэйшай дачкі да сярэдняй. Дзяўчаты – модніцы, таму мы не вельмі рады, што ў якасці адзінага элемента выбралі камізэльку, бо яна закрывае ўвесь дэкор на блузцы. Але я не супраць формы, бо гэта выглядае ўрачыста. Штосьці з тавараў можна набыць і на рынку ў Дзісне, але выбар не такі вялікі. Як шматдзетная сям’я атрымалі дапамогу на падрыхтоўку да школы, якраз хопіць на канцылярскія прылады.

Падрыхтавала Алена ВАРОНІНА.
Фота для ілюстрацыі.