Пасля выгрузкі асфальтабетоннай сумесі 56-гадовы кіроўца самазвала з Мядзельскага раёна рухаўся па дарозе з паднятым кузавам. Зачапіў провад лініі электраперадачы, выйшаў з кабіны і трапіў пад дзеянне электрычнага току. Загінуў ад атрыманых траўм.

Каб папярэдзіць трагедыю, выконвайце правілы электрабяспекі:

v пры падзенні провада на машыну кіроўца павінен неадкладна яе спыніць. Калі можна вызваліць аўтамабіль, ад’ехаўшы назад ці ўбок, трэба зрабіць гэта як мага хутчэй. Пра выпадак паведаміць уладальніку лініі;

v калі транспартны сродак немагчыма вызваліць ад абарванага провада, неабходна паведаміць пра здарэнне ўладальніку лініі або сігналам трывогі прыцягнуць увагу іншых кіроўцаў, якія паклічуць на дапамогу. Да прыбыцця аварыйнай брыгады прадпрымаць самастойныя дзеянні забаронена, як і набліжацца да машыны на адлегласць бліжэй за восем метраў;

v калі ў выніку падзення провада або ўзнікнення электрычнага разраду аўто загарыцца, то салон трэба неадкладна пакінуць. Прычым так, каб пазбегнуць адначасовага судакранання з машынай і з зямлёй. Лепш за ўсё скакаць на зямлю на абе-дзве сагнутыя нагі, не трымаючыся за аўтамабіль. Адыходзіць ад яго трэба дробнымі крокамі, якія не перавышаюць даўжыню ступні, і не адрываючы ступні ад зямлі.

Анатоль ІЛЬІЧОЎ, галоўны інжынер РЭС.
Фота для ілюстрацыі.