У Міёрскай дзіцячай школе мастацтваў дзеці могуць знайсці для сябе занятак па душы, пад кіраўніцтвам таленавітых педагогаў атрымаць карысныя навыкі. На музычным, мастацкім і харэаграфічным аддзяленнях у гэтым годзе навучаецца 295 выхаванцаў. Яны прымаюць удзел у канцэртах, перамагаюць у конкурсах. Словам, вядуць насычанае творчае жыццё, якое ўсебакова развівае асобу школьніка.

Міёрская дзіцячая школа мастацтваў бярэ пачатак з 1967 года, тады называлася музычнай. Пад кіраўніцтвам дырэктара Фёдара Ягоравіча Новікава заняткі вялі Галіна Іванаўна Петрачэнка, Эдуард Францавіч Таўкінь, Іраіда Пятроўна Дзерынг.

У сучасным калектыве 23 педагогі. Школа мастацтваў мае філіялы ў Дзісне (загадчык Галіна Леанідаўна Мядзелец) і Язне (Анастасія Міхайлаўна Бурштэйн), інструментальныя педкласы ігры на баяне ў Чапуках (выкладчык Таццяна Уладзіміраўна Званская) і Павяцці (Галіна Пятроўна Бунта). Студыю эстэтычнага выхавання могуць наведваць школьнікі незалежна ад узросту і часу навучальнага года, малодшыя — для вызначэння з родам заняткаў, старэйшыя — для падрыхтоўкі да экзаменаў.

З 2006-га дырэктар школы — Баляслаў Часлававіч Чарняўскі. Ён да любога пытання падыходзіць з увагай і няспешнасцю, да сваіх падначаленых ставіцца з павагай. Сам выкладае на мастацкім аддзяленні з 1991 года.

Завуч — Жанна Валер'еўна Каськевіч. Вядзе клас фартэпіяна, запатрабаваны піяніст, удзельнічае ў эстрадным калектыве, канцэртмайстар школьнага хору.

Творчыя калектывы ДШМ абараняюць гонар раёна ў мерапрыемствах і конкурсах разнастастайных узроўняў. Узорным аркестрам баянаў і акардэонаў кіруе амаль 30 гадоў Ігар Уладзіміравіч Лавец. Ён пераняў эстафету ад М.Р. Далгалёва. Першая назва — аркестр  народных  інструментаў. Калектыў — удзельнік  фестываляў  народнай  музыкі "Звіняць  цымбалы  і  гармонік" у Паставах, неаднаразовы прызёр абласных конкурсаў сярод узорных аркестраў,  выступае  на  канцэртных  пляцоўках   горада  і  школ. Колькасны  склад калектыву кожны год крыху мяняецца, але заўсёды налічвае каля 40 чалавек.  Падзеяй  для  школы  і  аркестра  стала  прысваенне  яму ў 2002-ім звання ўзорнага.

Ужо 5 гадоў інструментальны квінтэт вядзе Ігар Віктаравіч Бунта. Заснавальнікам быў Алег Генадзьевіч Драба. На народных інструментах іграюць Алена Ула-дзіміраўна Стома, Вячаслаў Расціслававіч Адзінец, Жанна Валер'еўна Каськевіч, Антоній Казіміравіч Блажэвіч. Яны — удзельнікі фестывалю "Звіняць цымбалы і гармонік", абласных Дажынак, рэспубліканскага фестывалю нацыянальных культур.

Працяг у “МН” №79.

Алена БАСІКІРСКАЯ.

На фотаздымках: узорны аркестр баянаў і акардэонаў, інструментальны квінтэт выкладчыкаў.