Як зберагчы веласіпед ад замахаў зладзеяў, расказаў участковы інспектар міліцыі Андрэй ТАЛАПІЛА:

– У апошнія гады на тэрыторыі раёна рэгіструецца ўсё больш фактаў крадзяжоў веласіпедаў. Галоўным чынам гэта звязана з павелічэннем іх колькасці, паболела і грамадзян, якія шукаюць лёгкай нажывы.

Веласіпеды даволі дарагія, пры гэтым іх нярэдка нядбайна захоўваюць: пакідаюць без нагляду, непрышпіленымі або зачыненымі такім замком, што можна ўскрыць голымі рукамі. Наўрад ці ёсць іншая маёмасць аналагічнага кошту, да якой бы ставіліся так жа бестурботна.

У большасці выпадкаў самі людзі ствараюць ідэальныя ўмовы для крадзяжу. Каб не страціць сваю маёмасць, рэкамендуем:

v  не пакідаць веласіпеды без нагляду ў грамадскіх месцах, на лесвічных пляцоўках, ля пад’ездаў. Найлепш падыходзіць для захоўвання кватэра;

v  карыстацца спецыяльнымі блакіруючымі прыстасаваннямі, пакідаючы транспарт на вуліцы нават на непрацяглы час, пры гэтым неабходна фіксаваць да агароджы не толькі раму, але і адно з колаў;

v  пры наведванні аб’ектаў гандлю і грамадскага харчавання ставіць веласіпед на спецыяльна абсталяваных пляцоўках або ў полі зроку камер відэаназірання;

v  не перадаваць яго чужым асобам;

v  захоўваць тэхнічны пашпарт або хаця б перапісаныя ідэнтыфікацыйныя нумары, фотаздымак транспарта. Гэта значна спросціць яго пошук у выпадку крадзяжу.

Калі ў адносінах да вас учынілі злачынства ці вы сталі відавочцам – неадкладна паведаміце пра гэта ў РАУС на нумар 102.

Падрыхтавала Алена ВАРОНІНА.
Фота для ілюстрацыі.