Вучні СШ №3 імя Ягора Томкі выступілі на куставым злёце клубаў юных пажарных-выратавальнікаў у Браславе. Сюды завіталі дзеці з Шаркаўшчыны, Верхнядзвінска, Пастаў, Докшыц, Глыбокага. 

У аглядзе ўдзельнікі дэманстравалі ўменні падаваць і выконваць страявыя каманды. Тут, як і ў пажарным спорце, міярчане сталі пятымі. Школьнікі па штурмавой лесвіцы пакаралі першы паверх вучэбнай вежы.

У тэарэтычнай частцы спаборніцтваў хлопцы і дзяўчаты адказвалі на пытанні па гісторыі пажарнай справы і асновах бяспекі жыццядзейнасці. Прадстаўнікі райцэнтра занялі другое месца. У першынствах "Відэаролік" і "Візітная картка" нашы землякі—чацвёртыя.

Па выніках спаборніцтваў міёрская зборная на пятым месцы. Перамаглі браслаўчане, а ў тройку лідараў увайшлі вучні з Верхнядзвінска і Докшыц.

У Мілашоўскім лагеры

На Міёршчыне стартавала рэспубліканская прафілактычная акцыя "Канікулы без дыму і агню". Да апошняга дня лета выратавальнікі будуць сустракацца з дзецьмі, галоўным чынам, у прышкольных лагерах. 

У лагеры Мілашоўскай ДС-БШ малышы ўдзельнічалі ў конкурсах, глядзелі мультфільмы з серыі "Чароўная кніга", разам чыталі пазнавальны часопіс "Юны выратавальнік". Паўтаралі правілы паводзін. Атрымалі маляўнічыя буклеты і памяткі.

Агняборцы пабывалі і ў лагеры Дворнасельскай ДС-СШ. Падчас экскурсій па пажарнай аварыйна-выратавальнай часці №1 у Міёрах вучні малодшых класаў з СШ №3 імя Ягора Томкі даведаліся, колькі вады ўмяшчаецца ў рэзервуар самай вялікай пажарнай машыны, для чаго патрэбныя "рукавы" і што такое "штаны". Прымерылі баявую вопратку, пасядзелі ў кабіне пажарнага аўтамабіля і пазнаёміліся з бытам байцоў. 

Аляксандр ЧАРНЯЎСКІ,

першы намеснік начальніка Міёрскага райаддзела па надзвычайных сітуацыях;
Дзмітрый ПЛОТНІКАЎ,

інспектар групы прапаганды і ўзаемадзеяння
з грамадскасцю Міёрскага райаддзела
па надзвычайных сітуацыях.