У мінулую суботу ў Міёрах праводзілі зіму і сустракалі вясну. Фальклорнае свята «Весяліся, народ, Масленіца ля варот!» прайшло з песнямі, танцамі і забавамі. Не абышлося без традыцыйных бліноў з розным начыннем. Увогуле, на плошчы ля Цэнтра культуры і народнай творчасці разгарнулася Шырокая Масленіца. Весела, смачна і цікава.
Пакуль збіраецца на свята народ, праходзім па тэматычных падворках сельсаветаў. У кожнага з іх – свая фішка. Павятчане, напрыклад, частуюць блінамі «Баунці» з тваражком, беляшамі з мясам і капустай, «слімачкамі» з ікрой.
Узмёнцы падрыхтавалі каравай і так званыя «балабэнікі».
– Сухарыкі, тварожнікі так завём, – дзеляцца гаспадынькі. – А бліны – з пылу, з жару, з чым жадаеце?! З маслам, са скваркамі.
Запрашаюць да стала і паказваюць выставу вязаных рэчаў: шалі, хусткі, дыванкі, рукавіцы. Ад іх вее цеплынёй рукатворных вырабаў. Усё можна купіць. Побач прадае дошчачкі для кухні рамеснік з Лявонпаля Віктар Тварановіч. Разбіраюць уміг. Перад намі пакупніца бярэ адразу чатыры.
На туркоўскім падворку прапаноўваюць беляшы з мясам, пірог з варэннем, бліны, сасіскі ў цесце, тварожныя шарыкі, хвораст, булачкі з мясам і згушчонкай.
Сапраўднае ўпрыгожванне свята – прадукцыя сыраробаў Аляксандра і Ганны Цітовых з Суромшчыны. Вырабляюць яе без дабаўлення заквасак па традыцыйных рэцэптах. Розны смак сыру абумоўлены ўмовамі паспявання.
– Кожны від індывідуальны – салодкі, з кіслінкай, са смакам яблыка, – дзеліцца Ганна.
Лепш за ўсё разыходзяцца вэнджаны «Джыл» і тварожны «Адыгейскі».
Ладзіць дэгустацыю сваёй прадукцыі мясакамбінат. Тут жа можна яе купіць.
Дзве міёрскія майстрыцы – Ксенія Маскаленка і Святлана Падабыцька – з пернікамі. Вырабы прыцягваюць увагу. У Ксеніі традыцыйныя ласункі, у Святланы – букеты і пернікавыя домікі.
– Мой брэнд «Светчын пернік». Мне здаецца, мяне ведаюць усе Міёры. У перніках люблю 3Д-канструкцыі, аб’ёмы і фактуры, – расказвае Святлана.
Многія з гаспадынек гатуюць блінцы адразу на месцы на плітках. Смачна! Супрацоўніцы Цэнтра культуры і народнай творчасці запрашаюць прыгатаваць гэтую страву. Ды не звычайна, а… на калодзе!
Побач ужо сабралася чарга. Адны жадаюць паўдзельнічаць у конкурсе, іншыя – паглядзець. Хутка разгараюцца калодкі, і жадаючыя беруцца за справу. Цеста хопіць усім, намяшалі цэлае вядро.
Спаборнічалі каля трыццаці ўдзельнікаў, некаторыя паспрабавалі пячы бліны на калодзе па-за конкурсам. Задумка спадабалася ўсім.
– Ахвотна гатавалі сабе і дзеткам. Асабіста я першы раз паспрабавала пячы бліны на калодзе. На будучыню гэта стане вельмі запатрабавана. Цікава, аўтэнтычна, – дзеліцца ўражаннямі рэжысёр ЦКіНТ Марына Дзям’янава.
У конкурсе па колцы дроў, які арганізаваў сектар спорту, 23 удзельнікі з 14-і арганізацый. З іх дзве жанчыны – супрацоўніца сектара Марына Канапелька і прадстаўніца Міёрскага раёна газазабеспячэння Крысціна Сташкевіч. Сыравіну прадаставіў Міёрскі філіял абласнога ўнітарнага прадпрыемства «Віцебск- аблпаліва».
– Шыкоўна! – перадае свае ўражанні Крысціна, якая ўзяла другое месца на мінулагоднім турніры па колцы дроў. – З такой задачай спраўляцца не ўпершыню як былому работніку лясгаса. Спадабалася, але на перамогу не разлічваю, паколькі мужчыны і жанчыны ішлі ў адзін залік.
У выніку на першым месцы аказаўся Ігар Байкоў з рай- аграсэрвісу, другое ўзяў Павел Шаховіч з лясгаса, на трэцім Аляксандр Пятровіч з РАНС.
Забаўляльную тэатралізаваную праграму падрыхтавалі супрацоўнікі Цэнтра культуры і народнай творчасці. Пад кіраўніцтвам Спадарыні Зімы, Вясны-Красны і Скамарохаў дзеці і дарослыя вадзілі карагоды, слухалі прыпеўкі, гулялі ў гульні і ўдзельнічалі ў конкурсах. У ліку апошніх – бег з яйкам, бітва венікамі, масленічны слуп, перацягні-ка. Пераможцы атрымлівалі прызы і ласункі.
Спектакль батлейкі «Прыгоды на Масленіцу» падрыхтавалі супрацоўнікі Чэраскага СДК. Святочны настрой падарылі гледачам народныя фальклорныя калектывы «Язынка» і «Іставіца».
Кожны знайшоў сабе забаву па душы. Дзеці каталіся з ледзяной горкі. Як сімвал хуткага прыходу вясны і штогадовага абнаўлення спалілі Масленіцу.
На плошчы было спякотна ад лагодных усмешак і вясёлых забаў, гарачага чаю і смачных бліноў. Па водгуках удзельнікаў, гэты дзень акунуў у 80-90-я гады. Паспрыяла таму сонечнае надвор’е, і, канешне, багацце снегу. Свята атрымалася.
Алена ВАРОНІНА.
Фотарэпартаж Казіміра БЛАЖЭВІЧА.
.jpg)