Іранічнае пытанне старшыні райвыканкама Ігара Кузняцова, ці ўваходзіць Дзісна ў склад Міёрскага раёна, на выязным пасяджэнні прагучала невыпадкова. У панядзелак, 5 верасня, прадстаўнікі раённай улады і кіраўнікі розных служб сабраліся ў будынку Дзісенскага гарвыканкама прааналізаваць работу па добраўпарадкаванні горада.
З ранейшых даручэнняў многае засталося недапрацаваным. У ліку "балючых кропак"—нядобраўпарадкаваныя тэрыторыі ля магазінаў райспажыўтаварыства, непафарбаваны будынак КБА, не прыведзеная ў парадак ладдзя, устаноўленая ў горадзе, незамененыя вокны ў будынку філіяла "Віцябчанкі". Патрабуе належнай увагі тэрыторыя ля рынка, нельга забывацца пра своечасовае грэйдзіраванне і падсыпку вуліц.
Прагучала заўвага наконт слабага асартыменту тавараў у магазінах райспажыўтаварыства. Няма ў наяўнасці ніводнага нумару цвіка і лямпачак менш за 150 Вт, а заяўкі прадаўцы не прымаюць.
Ігар Валер'евіч падкрэсліў, што рашэнні райвыканкама абавязковыя для выканання і запатрабаваў ад кіраўнікоў своечасовага і якаснага выпраўлення недахопаў.
Кацярына РЫНКЕВІЧ.
