Районный исполнительный комитет, Миорский районный Совет депутатов. Сайт www.miory.vitebsk-region.gov.by. регистрационное свидетельство № 956. Издано 6 января 2010 года Министерством информации Республики Беларусь
Яшчэ ў мінулым месяцы ў рэдакцыю раённай газеты па тэлефоне паступіла скарга на дрэнны даезд да Ідолтаўскага ФАПа. Як і належыць, суразмоўца прадставіўся. Але пазней высветлілася, што такі чалавек ні ў Ідолта, ні ў Павяцкім сельсавеце не зарэгістраваны і не пражывае. Улічваючы такую акалічнасць, яшчэ раз нагадваем тым, хто тэлефануе ў рэдакцыю па праблемных пытаннях, што неабходна абавязкова правільна называць сваё імя і прозвішча, указваць дакладнае месца жыхарства, свой тэлефон, каб пры патрэбе можна было звязацца з заявіцелем, праінфармаваць аб прынятых мерах. Нагадаем, што ананімныя звароты ў Рэспубліцы Беларусь не разглядаюцца, за выключэннем паведамленняў, якія ўтрымліваюць звесткі пра маючыя адбыцца, учыняемыя ці ўчыненыя злачынствы.
Перш чым накіраваць вышэйназваную скаргу на рэагаванне ў адпаведныя ўстановы, рэдакцыя пераканалася, што выкладзеныя ў ёй факты адпавядаюць сапраўднасці. Загадчыца Ідолтаўскага ФАПа Л. І. Леўша пацвердзіла, што ў нізкім месцы на невялікім прамежку дарогі непадалёку ад вясковай медустановы вясной і позняй восенню пры дажджлівым надвор’і ўтвараюцца вялікія лужыны, што, безумоўна, стварае пэўныя нязручнасці для насельніцтва. І, як высветлілася, гэтая праблема “пераходзіць” з году ў год, але раней ніхто не скардзіўся ў раённыя інстанцыі. Як кажуць, нарэшце дапякло!
Рэдакцыя газеты накіравала скаргу ў розныя інстанцыі, якія могуць паспрыяць хутчэйшаму вырашэнню праблемы. Трэба адзначыць, што в. Ідолта не так даўно набыла статус аграгарадка і дзіўна, што пры маштабным добраўпарадкаванні населенага пункта не заўважылі гэтую праблему.
Адказ начальніка філіяла “Міёрскае ДРБУ №203” на скаргу змясціўся ў двух радках: “Гравійная дарога паблізу ФАПа ў в. Ідолта не знаходзіцца на балансе ДРБУ №203”. Вось так канкрэтна, коратка, маўляў не наша справа і турботы не нашы.
Такі ж нешматслоўны адказ і ад старшыні Павяцкага сельвыканкама Л. Гардзель, хаця нам здавалася, што менавіта мясцовая ўлада павінна не толькі ведаць пра ўсе “гарачыя кропкі” на падведамнай тэрыторыі, але і прымаць меры для вырашэння ўзнікаючых праблем. Цытуем сціслае тлумачэнне: “Усе вуліцы ў населеных пунктах Павяцкага сельсавета знаходзяцца на балансе УП ЖКГ, у тым ліку і вул. Азёрная ў аг. Ідолта. УП ЖКГ вядома пра дадзеную праблему”. Узнікае сустрэчнае пытанне: “Калі ведаюць, то чаму не вырашаюць?”
Падрабязна патлумачыў сітуацыю в. а. дырэктара ВУПКУ “Міёрскі” В. Міхалкіў. Ён адзначыў, што нізінны ўчастак дарогі, сапраўды паблізу ФАПа на кароткі прамежак часу ( у перыяд разводдзя) становіцца складаным для праезду аўтатранспарту, бо дарога размываецца талай вадой. Для пешаходаў гэты ўчастак у любую пару года застаецца пераадольным. Неаднаразова сельгаспрадпрыемства ў гэтым месцы падсыпала гравій і разраўноўвала яго, але патрэбны больш маштабны рамонт, папярэднічаць якому павінна распрацоўка праекта на выкананне работ, а ВУПКУ “Міёрскі” ні профільных спецыялістаў у штаце не мае, ні ліцэнзіі на выкананне дарожна-рамонтных работ. У раёне ёсць службы, якія займаюцца такой дзейнасцю і могуць дапамагчы ў вырашэнні гэтага пытання. Кіраўнік гаспадаркі ўдакладняе, што пры бездарожжы да ФАПа можна дабрацца той жа дарогай, толькі з боку вёскі.
Дзякуй дырэкцыі сельгаспрадпрыемства за намаганні адрамантаваць дарогу і за падрабязны адказ. Звярнуліся і да дырэкцыі жыллёва-камунальнай гаспадаркі, якая непасрэдна адказвае за ўладкаванне вуліц у аграгарадку. У пісьмовым адказе в.а. дырэктара УП ЖКГ А. Каратаева “засвяцілася” надзея на станоўчае вырашэнне пытання: “…Па даведках, прадастаўленых старшынёй Павяцкага сельскага выканаўчага камітэта, грашовыя сродкі на рамонт вуліц у в. Ідолта ў сельвыканкаме маюцца.
Па запэўніваннях галоўнага інжынера ДРБУ №203 рамонт вуліц (у тым ліку і Азёрнай) будзе пачаты ў бліжэйшы час ( у чэрвені)”.
Такім чынам галоўнае звяно ў доўгім ланцужку на шляху вырашэння праблемы-Павяцкі сельвыканкам, якому на ўтрыманне і ўпарадкаванне ўсіх сельскіх дарог (з улікам работ па іх грэйдзіраванні, падсыпцы, абкошванні, расчыстцы снегу ў зімовы час і г. д) на гэты год выдаткавана ўсяго 29 мільёнаў 189 тысяч рублёў, у тым ліку на першы і другі кварталы — 10 млн. Увогуле на тэрыторыі сельскага савета патрабуюць рамонту і іншыя дарогі, але з улікам невялікіх аб'ёмаў фінансавання правесці яго адначасова на ўсіх "праблемных" участках немагчыма. Галоўны інжынер ДРБУ-203 С. С. Панізнік пацвердзіў, што нізкі ўчастак дарогі, які займае прыкладна 200 метраў, на вул. Азёрнай у Ідолта, абследаваны, вызначаны аб'ём работы і яна будзе выканана ў бліжэйшы перыяд. Па яго меркаванні, хопіць аднаго дня, каб зрабіць бесперашкодны ў любую пару года даезд да ФАПа.
Э. БЛАЖЭВІЧ.
Официальный сайт районной газеты" Миорские новости «©2010-2026 "mijory.by". Все права защищены. Индекс 63971. Перепечатка материалов разрешается только с указанием обратной ссылки на источник материала; фотоматериалов-только с официального разрешения. Редакция публикует материалы в порядке обсуждения, не разделяя точку зрения автора. Авторы отвечают за подбор и достоверность фактов
Наш сайт использует файлы cookie, в том числе сервисов веб-аналитики, чтобы улучшать работу сайта и делать его удобнее. Продолжая пользоваться сайтом, вы соглашаетесь на обработку персональных данных при помощи cookie-файлов. Подробнее в Политике обработки персональных данных и Информации об используемых файлах куки.