Яму яшчэ не споўнілася 18, калі, скончыўшы ў 1941-м сярэднюю школу, адразу быў прызваны ў армію. Яму ішоў 21-ы год, калі загінуў у баі, вызваляючы Міёршчыну ад нямецка-фашысцкіх захопнікаў. Імя Мікалая ІЗВАРЫНА назаўсёды ў гісторыі нашага горада. У гонар воіна-вызваліцеля названы вуліца і завулак. 9 мая адбылася ўрачыстасць з нагоды прысваення яго імя Міёрскай СШ № 2.

Нарадзіўся Мікалай Ізварын 29 кастрычніка 1923 года ў Арлоўскім раёне Растоўскай вобласці. Навучальнай установай пасля школы для яго стала ваеннае артылерыйскае вучылішча, скончыўшы якое, у ліпені 1942-га трапіў на фронт. Ваяваў у 26-й гвардзейскай гарматнай артылерыйскай брыгадзе рэзерву галоўнага камандавання. За праяўленыя ў баях мужнасць і ініцыятыўнасць узнагароджаны ордэнамі Чырвонай Зоркі, Айчыннай вайны І і ІІ ступеняў. Загінуў у баі 7 ліпеня 1944 года. Пахаваны ў Міёрах у брацкай магіле на плошчы Памяці загінулых барацьбітоў. Кароткую біяграфію воіна-вызваліцеля нагадалі вядучыя ўрачыстасці.

 У ліку гасцей – сваякі героя. Аляксандр, Вадзім і Мікалай Ізварыны на Міёршчыне ў другі раз. Разам з дырэктарам школы Уладзімірам Ханецкім і членам Савета Рэспублікі, дэпутатам Віцебскага абласнога Савета дэпутатаў Уладзімірам Мацвеевым Вадзім Ізварын адкрыў мемарыяльную дошку ў гонар свайго продка, што з’явілася на будынку ўстановы адукацыі (на фота).

– Шчыра рады зноў тут пабываць. Грэе душу, што шануеце памяць пра воінаў Вялікай Айчыннай вайны. Мікалай Ізварын – наш сямейны герой, – заўважыў Вадзім Валер’евіч.

Таксама ў школе з’явіўся музейны пакой, куды нашчадкі воіна-вызваліцеля перадалі 16 яго пісьмаў з фронту, што захоўваліся ў сямейным архіве. Гэта асабліва каштоўныя экспанаты. 

Кацярына РЫНКЕВІЧ.
Фота Казіміра БЛАЖЭВІЧА.