Ацяпляльны сезон 2022-2023 на Міёршчыне закончылі ў канцы красавіка. Яго вынікі нядаўна прааналізавалі ў раённым выканаўчым камітэце і на іх аснове паставілі задачы на наступны.

Па словах намесніка старшыні райвыканкама Яўгена Нікалаёнка, пры падрыхтоўцы да мінулага ацяпляльнага перыяду жыллёва-камунальная гаспадарка і арганізацыі раёна выканалі шэраг рамонтных, арганізацыйных і тэхнічных мерапрыемстваў. Іх мэта – забяспечыць устойлівае цеплазабеспячэнне жыллёвага фонду, аб’ектаў сацыяльнага і культурна-бытавога прызначэння. Асаблівую ўвагу надавалі рамонту асноўнага і дапаможнага абсталявання, замене цеплавых сетак, аднаўленню дахаў і адмостак дамоў.

Пасля капітальнага рамонту былі ўведзены ў эксплуатацыю два шматкватэрныя жылыя дамы – у райцэнтры плошчай звыш 1,35 тысячы м² і ў Язна плошчай больш за 1,5 тысячы м². Бягучым рамонтам ахапілі 480 м² дахаў, замянілі па чатыры помпы і цеплаабменнікі. Таксама ЖКГ выканалі работы па аднаўленні дзесяці пад’ездаў за кошт іх жыхароў.

Усе цеплакрыніцы, цэнтральныя цеплавыя пункты і ўнутраныя сістэмы былі гатовы да ацяпляльнага сезона і працавалі без збояў. У многім гэтаму паспрыяла замена 2,4 кіламетра трубаправодаў у Міёрах і Язна. Таксама быў праведзены рамонт воданагравальнага катла, што працуе на шчапе, у кацельні «Паўночная». Заменена ізаляцыя трубаправодаў агульнай працягласцю 1,8 км. Ачышчана ўнутраная паверхня 27 катлоў і шасці бойлераў, выпрабавана кацельнае абсталяванне і цеплавыя сеткі, праведзены прафілактычны рамонт і апрасоўка сістэм ацяплення 70 дамоў, а таксама 52 цеплавых вузлоў. Цалкам павераны прыборы ўліку цеплавой энергіі.

Сёння на абслугоўванні ЖКГ 17 кацельняў, з іх адна працуе на прыродным газе, яшчэ адна камбінаваная і 15 – на мясцовых відах паліва. Страты цеплавой энергіі ўласнай вытворчасці летась дасягнулі 6,7 % пры нарматыве ў 9,6 %. Доля мясцовых відаў паліва склала 75,9 %.

 За ацяпляльны сезон выкарысталі звыш 1,2 мільёна м³ прыроднага газу на суму амаль 800 тысяч рублёў. Дроў затрацілі каля 10,2 тысячы м³ на суму 262 тысячы рублёў. Па абодвух відах паліва была эканомія ў параўнанні з мінулымі перыядамі. А вось шчапы выкарысталі больш – каля 20,5 тысячы м³ супраць 17,85.

Для падрыхтоўкі кацельняў да наступнага ацяпляльнага сезона запланавана выканаць шэраг работ. У іх ліку прафілактычны рамонт абсталявання на 17 аб’ектах і трох цэнтральных цеплавых пунктах, ачыстка ўнутранай паверхні катлоў, прамыўка катлоў і цепласетак паўсюль, рамонт запорнай апаратуры, паверка прыбораў уліку цеплавой энергіі па кацельнях і жыллёвым фондзе, замена цеплаабменнікаў.

Да 1 кастрычніка ЖКГ павінна нарыхтаваць мясцовыя віды паліва ў аб’ёме 6 тысяч м³ дроў і 8 тысяч м³ шчапы. Да заканчэння ацяпляльнага перыяду плануецца стварыць запас яшчэ 4,5 тысячы м³ дроў і 12,5 тысячы м³ шчапы.

На 1 мая іх было адпаведна 700 м³ і 170 м³. Асноўны пастаўшчык – Дзісненскі лясгас. Згодна са спісамі, сёлета ён забяспечыў палівам 650 чалавек льготнай катэгорыі. У кагосьці быў брыкет, хтосьці адмовіўся ад дроў. Арганізацыям даставілі звыш 312 м³ дроў. Працягваецца нарыхтоўка і цяпер.

Міёрскі філіял гарпаліва за чатыры месяцы сёлета рэалізаваў звыш 1,4 тысячы тон торфабрыкету і каля 3,1 тысячы тон дроў.

Асноўныя недахопы, выяўленыя пры падрыхтоўцы аб’ектаў Міёршчыны да работы ў зімовы перыяд, – парушэнне тэрмінаў работы камісій па праверках гатоўнасці электраўстановак і няякасная падрыхтоўка або не ў поўным аб’ёме. У сувязі з гэтым сёлета неабходна надаць асаблівую ўвагу рэжымна-наладачным работам на цеплавых сетках па ўсіх кацельнях, рамонту цеплавой ізаляцыі запорна-рэгулюючай арматуры, фланцавых злучэнняў, гразевікоў і трубаправодаў у падвальных памяшканнях. Трэба замяніць цеплавыя сеткі і адрамантаваць сеткі асвятлення ў падвалах, зрабіць рэвізію кантактных злучэння уводна-размеркавальных прылад жылых дамоў. Тады сустрэнем зіму ў поўнай баявой гатоўнасці.

Падрыхтавала Алена ВАРОНІНА.
Фота з архіва рэдакцыі..