Своечасовае і бесперабойнае забеспячэнне гаспадарак гаручазмазачнымі матэрыяламі, а таксама эканомія і захаванасць – найважнейшы складнік паспяховай пасяўной кампаніі.

Напярэдадні пікавых нагрузак на транспарт падчас вясення-палявых работ кіраўніцтву і спецыялістам прадпрыемстваў варта асаблівую ўвагу надаць тэхнічнаму стану машын, якія перавозяць небяспечныя грузы. У прыватнасці, нясучым і крапежным элементам цыстэрн, колам і шынам, стану электраправодкі і яе абароненасці, спраўнасці зазямляльных прыстасаванняў, сродкам пажаратушэння. Немалаважнае значэнне мае своечасовае і якаснае тэхнічнае абслугоўванне транспартных сродкаў і спецыяльнага абсталявання цыстэрн.

Неабходна ў тэрмін дастаўляць ГЗМ, але такая ж пільная ўвага і бяспечнай арганізацыі зліва-наліўных аперацый і пагрузачна-разгрузачных работ. У тым ліку мерапрыемствам па ахове ад статычнай электрычнасці.

Улічваючы ўласцівасці небяспечных грузаў, важнае значэнне мае экалагічны аспект. Іх уздзеянне на навакольнае асяроддзе можа выклікаць незваротныя змяненні і нават гібель флоры і фаўны. Асабліва адчуваюцца адхіленні ад экалагічнай раўнавагі, якія выклікаюць здарэнні, – інцыдэнты ці аварыі з небяспечнымі грузамі. Напрыклад, забруджванне рэк і глебы, калі разліваюцца нафтапрадукты, гібель ці захворванне жывёл пры траплянні хімічных рэчываў у сцёкавыя воды, знішчэнне лясных масіваў у выніку пажару пры перавозках лёгкаўспламяняльных вадкасцей.

У любым выпадку неабходны строгі кантроль за перавозкамі небяспечных грузаў, уважлівыя і адказныя адносіны ўсіх удзельнікаў транспартыровачнага працэсу. Трэба пастаянна сачыць за ім і няўхільна выконваць Правілы па забеспячэнні бяспекі перавозкі небяспечных грузаў аўтатранспартам і супрацьпажарныя мерапрыемствы.

Валерый ЛОЙКА, намеснік начальніка ўпраўлення
Дэпартамента па наглядзе за бяспечным вядзеннем работ у прамысловасці.
Фота для ілюстрацыі.