Умовы і магчымасці стварэння даступнага асяродку для інвалідаў па зроку на Міёршчыне абмеркавалі на пасяджэнні міжведамаснага савета па правах інвалідаў райвыканкама. Удзел у мерапрыемстве прыняў старшыня праўлення абласной арганізацыі ГА «Беларускае таварыства інвалідаў па зроку» Канстанцін Ламчаноўскі.

Для ўдзельнікаў пасяджэння Канстанцін Ламчаноўскі правёў навучальны семінар па пытанні стварэння даступнага асяродку, правілах камунікацыі і ўзаемадзеяння з інвалідамі па зроку. Прадэманстраваў наглядны матэрыял: тактыльную плітку, шыльдачкі са шрыфтом Брайля і іншыя тыфласродкі. Азнаёміўся з работай, якая праводзіцца ў раёне ў гэтым накірунку.

Намеснік дырэктара ТЦСАН, прадстаўнік абласной арганізацыі БелТІЗ Ліліяна Батарчук адзначае:

– У першую чаргу больш даступнымі для інвалідаў па зроку павінны быць аб’екты сацыяльнай інфраструктуры. У нашай установе такі асяродак створаны: устаноўлены гукавы інфарматар з дыстанцыйным упраўленнем, які з дапамогай спецыяльнага дадатка ў тэлефоне паведамляе невідушчаму, побач з якой арганізацыяй ён знаходзіцца, як сюды зайсці і зарыентавацца ўнутры. Шыльдачкі на кабінетах прадубліраваны абазначэннямі са шрыфтом Брайля, пакладзены тактыльныя індыкатары. Таксама абуладкавана гукавым інфарматарам з дыстанцыйным упраўленнем аддзяленне сацыяльнай рэабілітацыі,  абілітацыі інвалідаў. Сёлета ствараецца даступны асяродак у адміністрацыйных будынках райвыканкама і ўпраўлення па працы, занятасці і сацыяльнай абароны. Паклапаціцца пра даступны асяродак для інвалідаў па зроку важна іншым арганізацыям і прадпрыемствам.

Кацярына РЫНКЕВІЧ.
Фота для ілюстрацыі.