У сувязі з пандэміяй медыцынскія работнікі працуюць у асабліва інтэнсіўным рэжыме. У грамадстве ўсё больш нераўнадушных, якія шукаюць магчымасці дапамагчы ў барацьбе з COVID-19. Важна і выратаваць пацыентаў, і засцерагчы саміх урачоў, медсясцёр, санітарачак ад небяспечнага віруса.

Сродкаў індывідуальнай аховы для тых, хто на перадавой, зашмат не бывае. 87 працэнтаў іх паступіла ў Міёрскую ЦРБ за кошт рэспубліканскага бюджэту ў парадку цэнтралізаванага забеспячэння. Астатнія 13 працэнтаў – спонсарская дапамога. Як расказала галоўны ўрач Алена Сівая, атрымлівалі яе па лініі прафсаюза, фонду міру, «Чырвонага Крыжа». Падтрымалі і імкнуліся палегчыць працу медыкаў бігосаўскае прадпрыемства «Інвет», фармацэўтычнае – «Рубікон», а таксама выратавальнікі раёна, прадпрымальнікі. Маскі, антысептыкі, дэзсродкі – усё гэта хутка расходуецца ў складаных умовах працы.

Да дабрачыннасці падключыўся і актыў металапракатнага завода. 7 мая ў цэнтральную раённую бальніцу завіталі прадстаўнікі прадпрыемства. З пажаданнямі калектыву ЦРБ здароўя таксама перадалі ўсё неабходнае для яго захавання ў няпросты эпідэміялагічны перыяд. Ва ўпакоўках маскі, ахоўныя шчыткі, якія можна апрацоўваць і выкарыстоўваць пастаянна, а таксама шапачкі, пальчаткі, бахілы, спецыяльныя касцюмы.

Галоўны ўрач Міёрскай ЦРБ Алена Сівая шчыра ўдзячна ўсім за дапамогу. З яе слоў, для медыкаў любая падтрымка цяпер вельмі важная і каштоўная.

Фота аўтара.

Наталія СТАНКЕВІЧ.