Единый день безопасности дорожного движения "Дорога не прощает ошибок!" пройдет 31 января на Миорщине

 Адзіны дзень бяспекі дарожнага руху «Дарога не даруе памылак!» пройдзе 31 студзеня на Міёршчыне. Яго мэта – прафілактыка ДТЗ з цяжкімі наступствамі.

У 2024 годзе на тэрыторыі Віцебшчыны зарэгістравана 400 дарожна-транспартных здарэнняў, у якіх 64 чалавекі загінулі, раненні атрымаў 451. У тым ліку на Міёршчыне лічбы склалі адпаведна 12, 1 і 15.

Галоўная прычына трагедый і бедаў на дарозе – чалавечы фактар. Удзельнікі дарожнага руху свядома парушаюць правілы, за што расплачваюцца сваім здароўем. Нярэдка бестурботнасць мае і куды больш высокую цану – жыццё.

Наўрад ці вадзіцель, які сядае за руль п’яным ці перавышае хуткасць, задумваецца, што ён можа аказацца ў зводцы ДАІ. Не падлічыць, колькі выпадковых удзельнікаў ДТЗ церпіць па чужой віне. Аднак прычына ўсіх выпадкаў – у ігнараванні правіл дарожнага руху.

Паважаныя аўтамабілісты, не забывайцеся пра павышаныя меры бяспекі ў халодны час года, выбірайце бяспечную хуткасць руху з улікам стану праезнай часткі, павялічвайце дыстанцыю і бакавы інтэрвал, пазбягайце любых рэзкіх рухаў і манеўраў. Дзяцей ва ўзросце да дванаццаці гадоў перавозьце ва ўтрымлівальных прыстасаваннях, а ўсе пасажыры павінны прышпільвацца. Будзьце ўважлівыя пры праездзе пешаходных пераходаў.

Паважаныя пешаходы, пераходзьце праезную частку дарогі толькі ва ўстаноўленых месцах. Упэўніцеся ў тым, што вадзіцелі вас бачаць. Памятайце, што транспартны сродак на халодным мокрым пакрыцці не заўсёды мае магчымасць хутка спыніцца. Пры пераходзе дарогі сачыце за абстаноўкай і ўпэўнівайцеся ў бяспецы сваіх дзеянняў. У цёмны час сутак абавязкова абазначайце сябе святлоадбівальнымі элементамі.

Менавіта ўзаемапавага і дысцыплінаванасць усіх удзельнікаў дарожнага руху – залог бяспекі.