Супрацоўнікі аховы першымі ў лічаныя хвіліны прыязджаюць на спрацоўку ахоўнай сігналізацыі, «трывожнай кнопкі» на аб’ектах прыватнай і дзяржаўнай уласнасці, выбываюць на дапамогу нарадам РАУС, калі гэта неабходна. Заўтра прафесійнае свята ў адной з самых аператыўных і мабільных служб міліцыі МУС. З гэтай нагоды размова з  начальнікам Міёрскага аддзялення аховы падпалкоўнікам міліцыі Міхаілам ПРАКОПЧЫКАМ.

Міхаіл Часлававіч, якія функцыі выконвае ведамасная ахова.

– Асноўныя задачы – ахова аб’ектаў розных форм уласнасці і грамадскага парадку. Сёння наш пункт цэнтралізаванага кіравання ў горадзе і на раёне ахоўвае 284 аб’екты, у іх ліку кватэры, дачныя дамы, гаражы фізічных асоб. «Трывожнымі кнопкамі» абсталяваны 41, і ахоўнай, і трывожнай адначасова карыстаюцца 24 заказчыкі. Дынамічнае развіццё не дазваляе застойвацца на месцы. Пастаянна абнаўляем тэхнічныя сродкі, удасканальваем падыходы да службы, нарматыўную базу.

Наколькі ў жыхароў Міёршчыны запатрабавана паслуга аховы кватэр, дамоў, гаражоў.

– Ахова маёмасці актуальная заўсёды. Пад аховай як дачныя дамы, якімі людзі карыстаюцца пераважна сезонна, так і жылыя памяшканні, дзе пражываюць пастаянна. На з’яўленне зламысніка ў аховы рэакцыя імгненная. Абсталяванне ахоўнай, пажарнай ці трывожнай сігналізацыяй гарантуе бяспеку грамадзянам і іх маёмасці. З мэтай папулярызацыі нашай службы праводзім «дні адчыненых дзвярэй», выступаем у калектывах горада, заўсёды інфармацыйна адкрыты для нашых кліентаў.

Некалькі слоў пра калектыў, каго б хацелі адзначыць.

– У калектыве ўсе – звёны аднаго ланцужка. Кожны выконвае сваю работу ў зладжаным комплексе. Наша служба заўсёды на варце законных інтарэсаў грамадзян і правапарадку. З міліцыянераў групы затрымання выдатна спраўляюцца са сваімі абавязкамі Юрый Рубанік, Сяргей Вішнеўскі, Іван Вішнеўскі, з паставых Віталь Бяспалы, з саставу вартаўнікоў – Леанід Касевіч, Віктар Кукуць, Сафія Яфімава, Іна Гарноўская. На днях праводзілі на заслужаны адпачынак міліцыянера Віктара Стому. Службе аховы ён прысвяціў 29 гадоў.

Усяму калектыву выказваю падзяку за адданасць прафесіі і за шчырую працу. Жадаю моцнага здароўя, дабрабыту сем’ям, надзейнага пляча напарніка, спакойных дзяжурстваў. Апошняе гучыць ідэалізавана, бо дзяжурствы здараюцца розныя. Мы для таго і працуем, каб людзі жылі спакойна. 

Вольга ВІШНЕЎСКАЯ.
Фота аўтара.