Майстры Дзісненскага Дома рамёстваў прынялі ўдзел у абласным свяце «Яблычны фэст» у вёсцы Алашкі Шаркаўшчынскага раёна і сталі пераможцамі ў конкурсе «У традыцыях сялянскага інтэр’еру».
– На конкурс рыхтавалі рэчы для ўпрыгожвання дома Івана Сікоры. Гэта падузорнікі, вышытыя накідкі на ложак, фіранкі, якія змясцілі ў вялікую скрыню. Адзін з вырабаў майстры дарылі ў якасці сувеніра для музея садавода-селекцыянера, – расказвае загадчык Дома рамёстваў Людміла Ганебная. – На гэтым свяце пабывалі ўпершыню. Зусім не чакалі, што пераможам у конкурсе. Канешне, гэта ўзрадавала. Атрымалі дыплом і каштоўны падарунак.
Таксама падчас свята праходзіла акцыя «Яблыня міру». Удзельнікі рыхтавалі сувеніры ў выглядзе яблыка і вешалі на дрэўца. Застаўся на ім і вязаны фрукт дзісненскай майстрыцы Ірыны Ядрэўскай.
Кацярына РЫНКЕВІЧ.
Фота прадаставіла Людміла ГАНЕБНАЯ.
