Чым пішуць карціны? Фарбамі, алоўкамі, мялкамі. Ёсць яшчэ адзін варыянт адказу – кветкамі. Такім мастацтвам штогод займаюцца работнікі ўчастка добраўпарадкавання УП ЖКГ. Ствараюць на гарадскіх клумбах мудрагелістыя ўзоры з кветак, каб яркія фарбы цешылі нашы позіркі і душы.

На сустрэчу з работнікамі камунальнай службы апранула рабочую форму і прыхапіла пальчаткі. Хацелася не толькі пачуць расповяды пра кветкавыя клопаты, але і самой да іх далучыцца. Хоць ненадоўга.

 Расліны і тэрапія

– Бачна, ці ёсць хто? – пытаюся ў фатографа, калі пад’язджаем да цяпліцы. Нам сказалі, што кветкаводы Алена Суравец і Алена Цярэшка яшчэ там, а пасля скіруюцца на гарадскія клумбы. Засталі іх за пагрузкай. Размеркаваўшы па скрынях і паліўшы саджанцы, адпраўляюць іх на пасадку. Чырвоная сальвія будзе красавацца ў гарадскім парку на клумбах, што з’явіліся сёлета ля помніка воінам-вызваліцелям.

Дзявятая гадзіна раніцы. Кветкаводы ў цяпліцы з 6.30. У перыяд пасадкі іх рабочы дзень пачынаецца рана. Для Алены Цярэшка гэта першая пасадачная кампанія. Прадавец па дыпломе стала кветкаводам сёлета ў сакавіку.

– Мая новая калега якраз петунію пікіравала. Мне спачатку нават у рукі страшна было ўзяць тыя маленечкія саджанцы, – успамінае першыя ўражанні. – Справа гэта клопатная, фізічна стамляешся, аднак вынік дорыць радасць.

Заходзячы ў цяпліцу, наўрад ці хто стрымаў бы вокліч захаплення. Позірку адкрываецца жывая рознакаляровая панарама разнастайных раслін.

– Частку гэтай прыгажосці ўжо на клумбы высадзілі, – заўважае Алена Суравец. – Сёлета ўпершыню пасадзілі фіялетавую і белую сальвіі. Коліус трох відаў. Некалькі разнавіднасцяў петуній і аксамітак. Практычна ўсе кветкі вырошчваем з насення.

У недалёкім мінулым Алена Леанідаўна – медработнік. Медыцыне прысвяціла 25 гадоў. Апошнім часам працавала медсястрой у стаматалагічным кабінеце. Змяніць месца працы прымусіў каронавірус. Пасля перанесенага захворвання стала складана спраўляцца са службовымі абавязкамі.

– Кветкі вярнулі мяне да жыцця, – усміхаецца суразмоўніца. – Працую ў цяпліцы год. Шмат чаму навучылася ў нашага майстра Надзеі Лонскай. Як правільна сеяць і пікіраваць расаду, як ствараць кветкавыя кампазіцыі на клумбах. Сваю новую работу ўсёй душой палюбіла. Яна няпростая, аднак прыемная і эстэтычная.

  Рулетка ў справе

Пакуль кветкаводы адпраўляюць у горад эстэтычныя грузы, на плошчы Памяці загінулых барацьбітоў ідзе пасадка аксамітак на адной з доўгіх клумб па перыметры тэрыторыі. Далучыліся да справы прыбіральшчыкі прыдамавых тэрыторый Валянціна Варонька, Таццяна Гаўрута, Алена Кабёлка і Валянціна Сцепулёнак. Высадзіць кветкі трэба ў цэнтры клумбы па ўсёй даўжыні трыма роўнымі радамі.

– Па краях будзе белая бягонія. Аксаміткі зацвітуць аранжавым колерам. Атрымаецца прыгожая кампазіцыя, – заўважае Валянціна Варонька, трымаючы ў руках рулетку. – З гэтым інструментам зручней. Адлегласць паміж радамі павінна быць 20 сантыметраў, а паміж кветкамі ў радку – 15.

Асцярожна бяру яшчэ невялікія саджанцы і апускаю ў зямлю з думкамі, каб раслі дужымі і прыгожымі. Стараюся вытрымліваць зададзеную адлегласць і сачыць за роўнасцю радка. Час ад часу Таццяна Гаўрута правярае, якой атрымліваецца агульная кампазіцыя, карэкціруе, куды які саджанец перамясціць. Ад уважлівага позірку былой швачкі не схаваецца нават нязначная няроўнасць.

– Раней зусім увагі не звяртала на кветкавыя кампазіцыі на гарадскіх клумбах. Цяпер гляджу на іх па-іншаму, – заўважае яна.

– Ой, дзяўчаты, у Алёнкі радок загуляў, – ускліквае Валянціна Варонька, – трэба паправіць.

Праз непрацяглы час пасля некалькіх карэкціровак тры роўныя радочкі аксамітак расцягнуліся ў цэнтры клумбы. Яшчэ толькі дзясятая гадзіна раніцы, наперадзе большая частка рабочага дня, на працягу якога камунальнікі намалююць не адзін кветкавы ўзор.

Кацярына РЫНКЕВІЧ.
Фотаматэрыял Казіміра БЛАЖЭВІЧА.