Пасяджэнне раённага савета пажылых грамадзян адбылося ў снежні ў тэрытарыяльным цэнтры сацыяльнага абслугоўвання насельніцтва. Правёў яго і выступіў з інфармацыяй аб дзейнасці за апошні квартал года кіраўнік грамадскага фарміравання Пётр Пятроў. Ён адзначыў, што савет актыўна супрацоўнічае з сацыяльнымі і гаспадарчымі службамі, прафсаюзамі, ветэранскімі і іншымі арганізацыямі па ўцягненні пажылых людзей у грамадскае жыццё раёна, у правядзенне масавых мерапрыемстваў. Яго члены прымалі ўдзел у падрыхтоўцы святкавання Дня мудрага чалавека – 1 кастрычніка, у раённым турніры па шашках, абласных форумах, нават міжнародных злётах.

Карысным быў міжнародны форум здаровага ладу жыцця ў Оршы. Не толькі пераймалі чужы вопыт нашы прадстаўнікі на міжнародным злёце валанцёраў сярэбранага ўзросту ў Віцебску ў пачатку снежня, але і дзяліліся сваім. Там, дарэчы, цікавасць суседзяў-беларусаў і расіян выклікаў падрыхтаваны спецыялістамі ТЦСАН інфармацыйны кейс рэкамендацый рашэнняў жыццёвых пытанняў пажылых людзей. Сумесная з шаркаўчанамі паездка ў Мінск і па наваколлі сталіцы прадэманстравала прыклады павышэння прыцягальнасці турыстычных аб’ектаў. Некаторыя з іх рэальна выкарыстаць і ў нашых умовах.

У адпаведнасці з праграмай дзейнасці, раённы савет пажылых людзей даў старт сустрэчам-віншаванням з ветэранамі- юбілярамі.
Значную ўвагу члены савета надалі абмеркаванню плана работы на 2026 год, які прадстаўляла Ганна Ліскова. Ён прадугледжвае арганізацыю масавых мерапрыемстваў ці ўдзел у іх, экскурсіі і паездкі, турніры па шашках, шахматах і дартсе, віншаванні юбіляраў, банк ідэй, увядзенне рубрык у газеце, календара падзей і іншага. Прагучала прапанова па выданні другога тома кнігі «Памяць», а старшыня савета Пётр Пятроў нават правёў азнаямляльны інструктаж па арганізацыі будучых спаборніцтваў па дартсе. Аказваецца, гэта можа быць цікавым і захапляльным. 

Леанід МАТЭЛЕНАК.

Фота для ілюстрацыі.