Першага верасня – дзень святочны. Складнік любога свята – падарункі. На Міёршчыне іх пачалі дарыць яшчэ да пачатку новага навучальнага года.

Самым галоўным падарункам для міёрскай малечы стаў дзіцячы сад № 2 «Жураўлік». Разам з будаўнікамі шчыравалі на новабудоўлі супрацоўнікі многіх арганізацый і прадпрыемстваў раёна. Клапаціліся пра ўтульнасць і парадак.

На наваселле ўстанова дашкольнай адукацыі атрымала шмат падарункаў. Ад Віцебскага аблвыканкама – сертыфікаты на інтэрактыўную падлогу і цацкі, ад раённых выканаўчага камітэта і Савета дэпутатаў – на абсталяванне для басейна, на ламінатар – ад абласнога ўпраўлення МНС, на канструкцыі для добраўпарадкавання і азелянення – ад ААТ «Інвет», якое ўзначальвае дэпутат абласнога Савета дэпутатаў Сяргей Грамадка. Каляровы прынтар – падарунак ад прадпрымальніка з Дзісны Эдуарда Цярэшкі. Бацькі выхаванцаў паклапаціліся пра сертыфікат на набыццё цацак. Падарылі цацкі для дзетак прадстаўнікі раённай арганізацыі ГА «Белая Русь».

Таксама арганізацыя падтрымлівае рэспубліканскую дабрачынную акцыю «Белая Русь» – з любоўю да дзяцей». Для ўсіх першакласнікаў раёна набылі наборы канцылярскіх прылад, якія дзеці атрымалі на першавераснёўскіх лінейках. Такімі ж падарункамі парадаваў падапечных з дамоў сямейнага тыпу «Беларускі фонд міру».

Выхаванцы дзіцячых дамоў сямейнага тыпу і сацыяльнага прытулку парадаваліся падарункам і салодкім ласункам ад раённай арганізацыі ГА «Беларускі саюз жанчын», якая далучылася да рэспубліканскай акцыі «Збяром партфель разам» (на фота). Таксама ў дзіцячы сацыяльны прытулак у Дзісне з падарункамі да новага навучальнага года завіталі прадстаўнікі раённых аддзелаў унутраных спраў і па надзвычайных сітуацыях, аддзялення Белаграпрамбанка, маладзёжнага праваслаўнага руху «Ладанка».

Кацярына РЫНКЕВІЧ.
Фота Казіміра БЛАЖЭВІЧА.