Іспыты на спрыт і вынослівасць, крэатыў і эрудыцыю, артыстызм і гаспадарлівасць здавалі 16 чэрвеня школьнікі на турзлёце ва ўрочышчы Навалака. Спаборнічалі дзевяць каманд з сямі ўстаноў адукацыі.

Доўжыўся турзлёт адзін дзень, паспець трэба было шмат. Падчас арыенціршоў юныя турысты шукалі ў лабірынце абазначаныя на карце кантрольныя кропкі. Акцэнты ў прадстаўленні каманды неабходна было расставіць на папулярызацыі здаровага ладу жыцця і турызму, адметнасцях сваёй мясцовасці. Абавязковы складнік творчай візіткі – песня. Турыстычную, а таксама тэматыку 81-гадавіны Перамогі ў Вялікай Айчыннай вайне і Года беларускай жанчыны адлюстроўвалі ў насценгазетах «Будні турзлёту». Таксама Году беларускай жанчыны быў прысвечаны конкурс краязнаўцаў. У конкурсе турыстычнага быту ацэньваліся эстэтыка і парадак у лагеры.

– Пераможцаў вызначалі ў двюх узроставых групах: сярэдняй і старэйшай, а таксама ў агульнакамандным заліку, – заўважае метадыст раённага Цэнтра дзяцей і моладзі Вераніка Шамінка. – Лідарам у сярэдняй узроставай групе стала каманда Дзісненскай СШ імя М. Кузьміна. На другім месцы Язненская СШ, на трэцім – Узмёнская БШ. У старэйшай узроставай групе таксама першыя дзісненцы. Другое месца ў СШ № 2 імя М. Ізварына, трэцяе – у СШ № 3 імя Героя Савецкага Саюза Я. Томкі. У агульнакамандным заліку тройка лідараў выглядае так: першыя – турысты з Дзісненскай СШ імя М. Кузьміна, другое месца падзялілі каманды Узмёнскай і Язненскай школ, на трэцім – СШ № 2 імя М. Ізварына.