Спраўна наведваць заняткі і не спрабаваць на смак мядовыя фарбы, уважліва слухаць настаўнікаў і не выкарыстоўваць гуаш для баявой афарбоўкі твару… Адначасова сур’ёзны і гумарыстычны змест мела клятва юнага мастака, якую давалі першакласнікі выяўленчага аддзялення дзіцячай школы мастацтваў. Пасвячэнне ў мастакі стала тут новай традыцыяй, сёлета адбылося ў трэці раз.

У гэтым навучальным годзе на выяўленчым аддзяленні ДШМ займаецца 109 вучняў. Залічана на заняткі 30 першакласнікаў, з іх 20 на сямігадовы тэрмін навучання, дзесяць – на пяцігадовы.

 З юнымі творцамі працуюць пяць матываваных, захопленых справай педагогаў. Іх высокі прафесіяналізм падкрэсліў дырэктар установы Ігар Лавец. Творчых поспехаў першакласнікам пажадаў загадчык аддзялення Баляслаў Чарняўскі. Заўважыў, што навыкі, якімі авалодаюць падчас навучання, спатрэбяцца ў розных сферах дзейнасці.

 Як бывае ў казках, перш чым штосьці атрымаць, трэба сябе праявіць, заўважыла вучням вядучая мерапрыемства, педагог Анастасія Бурштэйн. Юных мастакоў чакалі творчыя задачкі: адгадвалі тэматычныя загадкі і складалі мастацкія словы, вызначалі навобмацак схаваныя прадметы і пісалі калектыўны партрэт. Усе без выключэння паспяхова прайшлі іспыты.

Урачысты момант – клятва юнага мастака. Першакласнікам уручылі медалі і салодкія падарункі.

 Кацярына Рынкевіч.
Фотаматэрыял Казіміра Блажэвіча.