Ад наркотыкаў ніхто не застрахаваны, аднак кожны – гаспадар свайго жыцця. Гэтая думка стала лейтматывам сустрэчы, прымеркаванай да Міжнароднага дня барацьбы з наркаманіяй і наркабізнесам, што прайшла ў тэрытарыяльным цэнтры. На інфарм-дайджэст «Не аднімай у сябе заўтра!» запрасілі старшакласнікаў са школ райцэнтра.

У руках падлеткаў невялікі яркі футляр. Унутры штосьці ёсць. Школьнікі круцяць прадмет у руках, падстаўляюць яго на святло, выказваюць свае здагадкі наконт змесціва. Нарэшце, адчыняюць футляр.

 
– Даволі часта наркотыкі прапаноўваюць у зманлівай яркай абгортцы, а спрабуюць іх з-за цікаўнасці, – заўважыла вядучая сустрэчы, псіхолаг ТЦСАН Зінаіда Равецкая.

 
Разам з вядучай дзеці назвалі іншыя прычыны, што прыводзяць да згубнай звычкі. Сярод іх – негатыўны ўплыў кампаніі, часткай якой хоча стаць падлетак, жаданне новых адчуванняў. Школьнікам паказалі пазнавальны і даступны відэаролік пра ўздзеянне наркотыкаў на чалавека. Нагадалі, што нарказалежнасць – цяжкая хвароба, вылечыць якую вельмі складана. Раілі быць уважлівымі да свайго здароўя і не паддавацца на маніпуляцыі, мець свой унутраны стрыжань.

 
 – Маленькіх доз не бывае, – падкрэсліла старшыня раённай арганізацыі Чырвонага Крыжа Ганна Ліскова. У прыклад прывяла трагічную гісторыю маладога чалавека, які ўпершыню паспрабаваў наркотыкі і выйшаў у акно. Азнаёміла з лічбамі сусветнай статыстыкі: дзесяць гадоў таму наркотыкі пачыналі спрабаваць у 26 гадоў, цяпер – у 16 – 18.

 
Здавалася б, наркаманія – праблема сучаснасці. Між тым першыя пісьмовыя ўпамінанні пра прыгатаванне і ўжыванне опіума адносяцца да 5 тысяч гадоў да нашай эры. Старажытныя шумеры называлі опіум «gil», што азначае «радасць». Толькі эмоцыя гэта сумніўная і зусім не вартая тых пакут, якія цягне за сабой знаёмства з наркотыкамі.

 
Калі паставіць на адну чашу вагаў наркотыкі, а на другую – паўнацэннае жыццё з цікавымі зносінамі, любімымі хобі, самаразвіццём, становіцца відавочным, што павінна пераважаць. А самая эфектыўная прафілактыка нарказалежнасці – цвёрдае «Не!», сказанае аднойчы і назаўсёды.

У Беларусі дзейнічае сацыяльна арыентаваны інфармацыйны рэсурс «POMOGUT.BY». На сайце размешчаны кантакты арганізацый і грамадскіх аб’яднанняў, якія дапамагаюць нарказалежным і сузалежным асобам. Тут можна атрымаць анлайн-кансультацыю па пытаннях аказання дапамогі нарказалежным.

Кацярына РЫНКЕВІЧ

Фотаматэрыял аўтара.