Кацярына РЫНКЕВІЧ

Фота Казіміра БЛАЖЭВІЧА

Дзевяцікласніца Ліза Дзем'янава з Сіцькоўскай школы вучыцца на "сямёркі"-"дзявяткі", удзельнічае ў алімпіядах, піша вершы, малюе і чытае фантастыку.

Ліза расказвае, што пісаць вершы пачала ў трэцім класе. Цікавіць філасофская тэматыка. Запісвае свае творы ў сшытак ці ў мабільны тэлефон. Настаўнікам і сябрам не паказвае — гэта для душы.

На раённай алімпіядзе па беларускай мове і літаратуры стварыла вершаваны водгук на санет Максіма Багдановіча. Атрымала высокі бал. Добра справілася з практычнымі заданнямі. Да спаборніцтва рыхтавала настаўніца Алена Шамшур. Дыплом ІІ ступені парадаваў і вучаніцу, і выкладчыка. З алімпіяды па біялогіі вярнулася з дыпломам ІІІ ступені. Гэтую навуку штудзіруе з настаўнікам Пятром Панктратам.

У мінулым годзе Ліза спаборнічала ў раёне па любімым прадмеце — замежнай мове. Вывучае англійскую. Выступіла годна, але да дыплома балаў не хапіла.
— На алімпіядах не хвалююся. Проста выконваю заданні. Вучоба лёгка даецца. Добра запамінаю матэрыял, — расказвае Ліза. — У вольны час чытаю кнігі. Падабаюцца фантастыка і прыгоды. Нядаўна прачытала "Майстра і Маргарыту". Твор уразіў. Маляваць люблю, асабліва коней.
Магчыма, гэты год у школе для Лізы апошні. Плануе паступаць у педагагічны каледж.