«Ад пакалення да пакалення: разам будуем будучыню Беларусі». Пад такім дэвізам напярэдадні Дня Канстытуцыі Рэспублікі Беларусь прайшла ўрачыстасць, падчас якой прынялі папаўненне ў рады рэспубліканскіх грамадскіх аб’яднанняў.

Тысячы хлопчыкаў і дзяўчат ад сямі да 14 гадоў аб’ядноўвае БРПА, заўважыла выконваючы абавязкі старшыні раённай піянерскай арганізацыі Надзея Шымуковіч. Нагадала абавязкі піянера: быць адказным, працавітым, сумленным, любіць сваю радзіму. Урачыстае абяцанне іх выконваць далі чацвёртакласнікі СШ № 3 імя Героя Савецкага Саюза Я. Томкі і СШ № 2 імя М. Ізварына. Піянер – значыць, першы, падкрэсліла старшыня раённай ветэранскай арганізацыі Галіна Гур’ева і пажадала дзецям праяўляць сябе і быць першымі ва ўсіх справах.З уступленнем у рады БРСМ павіншавала моладзь актывістка грамадскага жыцця, былая старшыня раённай арганізацыі Беларускага фонду міру Ала Смерцьева. Пажадала поспеху і адзначыла, што разам можна зрабіць шмат.Актыўна ўдзельнічае ў жыцці краіны ГА «Белая Русь», заўважыў старшыня раённай арганізацыі Валерый Драба. Выказаў упэўненасць, што новыя ўдзельнікі грамадскага аб’яднання таксама паспрыяюць у рэалізацыі важных праектаў.У падарунак удзельнікі ўрачыстасці атрымалі Канстытуцыю Рэспублікі Беларусь.

Яркімі момантамі святочнай сустрэчы сталі музычныя нумары выхаванцаў раённага Цэнтра дзяцей і моладзі. 

Кацярына РЫНКЕВІЧ.

Фота аўтара.