Лаканічнасць нацюрморта, маляўнічасць пейзажа, выразнасць партрэта. На выяўленчым аддзяленні дзіцячай школы мастацтваў (ДШМ) дзейнічае выстава вучэбных і творчых работ.

Выставу па праву можна назваць сямейнай. Аўтары работ – муж і жонка Аляксандр і Вольга Чарняўскія. У Аляксандра ўласная справа, Вольга выкладае на выяўленчым аддзяленні ДШМ. Калісьці разам вучыліся на мастацка-графічным факультэце ВДУ імя П. Машэрава. Большасць з прадстаўленых на выставе работ напісаны ў студэнцкую пару.

Лаканічная кампаноўка адрознівае нацюрморты, прасторам і багаццем колеру вабяць пейзажы. Шмат партрэтаў. Напрыклад, на адным з іх адзін і той жа чалавек адлюстраваны ў розных ракурсах.

Асобна вылучаецца стэнд з фотаздымкамі скульптур, створаных Аляксандрам. У іх ліку выявы двух апосталаў, што знаходзяцца ў касцёле ў Міёрах. У вёсцы Слабада вандроўнік паба- чыць скульптуры Іясафата Кунцэвіча, Ефрасінні Полацкай. Помнік «Дзеці міру – дзецям вайны», размешчаны ў скверы ў нашым райцэнтры, таксама стварыў Аляксандр Чарняўскі.

Дзверы выяўленчага аддзялення адчынены для гасцей. Наведаць выставу можа кожны аматар творчасці.

Кацярына РЫНКЕВІЧ.

Фота з альбома выяўленчага аддзялення ДШМ.