10 ліпеня народныя ўмельцы з райцэнтра адправяцца на кірмаш у горад майстроў, што разгортвае сваю дзейнасць на “Славянскім базары ў Віцебску”. Гэта Алена Эдвардаўна Батарчук з керамічнымі вырабамі, Алімпіяда Іосіфаўна Пятрова з вышыванымі карцінамі і майстры саломапляцення Баляслаў Часлававіч і Галіна Іосіфаўна Чарняўскія. Прыхапіўшы з сабой матэрыял для працы, яны, як і шматлікія іншыя ўдзельнікі кірмашу, будуць тварыць самабытныя рэчы на вачах гараджан і гасцей.

У трэці раз у фестывальным горадзе пройдзе конкурс майстроў саломапляцення “Папараць-кветка”, прысвечаны сёлета 65-годдзю Вялікай Перамогі. Як ніхто іншы, любіць і ўмее працаваць з сонечным матэрыялам сям’я Чарняўскіх. Па традыцыі яна і прыме ўдзел у гэтым “праслаўленні” старажытнага рамяства ў намінацыі “Саламяная скульптура”. Пажадаем ёй творчых поспехаў.