З 11 да 16 ліпеня сваю творчасць на "Славянскім базары" ў Віцебску прадстаўлялі Дамы рамёстваў. Праўда, на гэты раз іх размясцілі асобна ад падвор'яў і Горада майстроў. Ад дзісенскага Дома рамёстваў у абласны цэнтр ездзілі метадысты-майстры Наталля Валер'еўна Валенцік і Вольга Сцяфанаўна Шастак, дарэчы, ужо ў трэці раз. А вось кіраўнік гурткоў Ганна Вадзімаўна Лаўрыновіч — у першы. Яны прадстаўлялі ўдзельнікам фестывалю абрэзкавае шыццё, вышыўку, вязанне, саломку, дэкаратыўна-прыкладную творчасць. Усё гэта карысталася ўвагай наведвальнікаў, аднак у асноўным куплялі сувенірныя вырабы.

Нашы ўдзельнікі базару адзначылі добрую арганізацыю выстаў. Былі прадугледжаны адпачынак, харчаванне, начлег. Вось толькі крыху падвяло надвор'е. Устаноўка палатак не прадугледжвалася, а таму дождж падмачыў экспанаты, не выратавала нават падрыхтаваная плёнка.

Па ўласнай ініцыятыве не першы раз на "Славянскі базар" скіроўваецца з Дзісны майстар па абрэзкавым шыцці Таццяна Анатольеўна Кісель. Яна прадстаўляла свае маляўнічыя палотны, сувеніры і цацкі. Адзначае, што наведвальнікаў было шмат, увага да абрэзкавага шыцця наогул вялікая. У гэтым відзе творчасці шырока былі прадстаўлены не толькі Беларусь, але і Расійская Федэрацыя. На здзіўленне, найбольш вопытнымі майстрамі ў пэчворку аказаліся якуты, якія дэманстравалі пейзажы, пано, аб'ёмныя творы розных напрамкаў і стыляў. Таццяне Анатольеўне асабліва спадабаліся пейзажы і нацюрморты, створаныя з кавалачкаў тканіны. Яна ўдзельнічала ў пленэрах і атрымала запрашэнне на конкурс творцаў абрэзкавага шыцця да алімпіяды ў наступным годзе ў Сочы. Для гэтага трэба падрыхтаваць арыгінальны выраб 35 на 35 сантыметраў на тэму "Зіма. Расія. Алімпіяда".

Сярод іншых твораў майстроў нашу зямлячку вельмі ўразілі кавальская справа, разьба па дрэве і лозапляценне.

Л. МАТЭЛЕНАК.