XXXV Міжнародны фестываль мастацтваў «Славянскі базар у Віцебску» адбудзецца з 14 па 20 ліпеня. Да конкурсаў, што пройдуць падчас фестывалю, рыхтуюцца міёрскія артысты і ўмельцы.

На традыцыйным кірмашы рамёстваў «Горад майстроў» прадставяць вырабы ўдзельніца студыі керамікі «Журавіны» ЦКіНТ Ганна Філіповіч і народныя ўмельцы з Дзісненскага гарадскога Дома рамёстваў. Дзісненскі майстар Віктар Баўтот прыме ўдзел у конкурсе разьбы па дрэве «Дрэва жыцця».

З прыпеўкамі на конкурсе «А музыкі граюць…» выступяць салістка эстраднай студыі ЦКіНТ Ганна Лапуцэвіч і ўдзельніца фальклорнага калектыву «Іставіца» Ніна Шупейка. Таксама на гэтым творчым спаборніцтве народнай музыкі сыграе ансамбль «In sound» дзіцячай школы мастацтваў.

Шэсць пар паспаборнічаюць у міжнародным турніры нацыянальных танцаў «Танчым разам».

У дзень урачыстага адкрыцця фестывалю – 16 ліпеня – з канцэртам на брэндавай пляцоўцы Міёрскага раёна выступяць салісты ЦКіНТ.

Кацярына Рынкевіч.