Выстава работ Віктара Крука дзейнічае на выяўленчым аддзяленні Міёрскай дзіцячай школы мастацтваў. Адкрыццё адбылося з удзелам аўтара, вучняў і педагогаў установы, работнікаў культуры. Цэнтральнае месца ў творчасці мастака займае партрэт. На выставе прадстаўлены групавыя і адзіночныя партрэты, некалькі вясковых эцюдаў.

Ефрасіння Полацкая, Ян Баршэўскі, Янка Купала і іншыя вядомыя асобы глядзяць з партрэтаў Віктара Крука. Прадстаўлены на выставе і аўтапартрэт. Кожная работа мае свае гісторыю і сэнс. Напрыклад, карціна «Старая фрэска» з партрэтам беларускага пісьменніка Уладзіміра Караткевіча ў цэнтры – напамін пра важнасць захавання гісторыі.

Як заўважыў Віктар Фёдаравіч, пісаць партрэты з фотаздымкаў ён не любіць. Таму Васіля Быкава ствараў, праглядаючы яго відэаінтэрв’ю. Са слоў мастака, на відэа бачыш жывога чалавека, лепш заўважаюцца яго адрозныя рысы. Паэта Рыгора Барадуліна ў свой час пашчасціла пісаць з натуры.

Знаёмячыся з творамі Віктара Крука, глядач знаёміцца з таленавітымі беларускімі творцамі. У іх ліку скульптар Алесь Шатэрнік, адна з работ якога стала экспанатам музея Вялікай Айчыннай вайны, Георгій Скрыпнічэнка, якога называлі беларускім Сальвадорам Далі, графік Мікола Купава і іншыя.
Удзельнікам сустрэчы Віктар Фёдаравіч прапанаваў паразважаць пра сутнасць і каштоўнасць сапраўднага мастацтва. Заўважыў, што яно немагчыма без прафесіяналізму.

Першыя крокі да высокага мастацтва робяць выхаванцы ДШМ. У гэтым навучальным годзе на выяўленчым аддзяленні займаюцца 108 вучняў. 

Кацярына РЫНКЕВІЧ.