Вуліца Кузьміна — гэта ўскраіна Дзісны. Менавіта на ёй па суседству з сасоннікам размясцілася вытворчая база таварыства з абмежаванай адказнасцю "Аўтасэрвіс-Дзвіна". Гэта раней асноўным заняткам ТАА былі рамонт і рэалізацыя аўтатэхнікі. Але для такой дзейнасці маленькі гарадок і яго наваколле не забяспечвалі заказамі. Дрэваапрацоўка аказалася больш надзейнай справай. Таму аўтасэрвісам займаюцца толькі два чалавекі, а з драўнінай працуе 15. І вось тут, на Кузьміна, 3 — штабялі бярвенняў, дошак, брусоў.

Кіраўнік ТАА "Аўтасэрвіс-Дзвіна" Э. К. Цярэшка паказвае сваю гаспадарку. Пры ўваходзе ідзе ацыліндроўка бярвенняў. Хаця пры гэтым і выкарыстоўваецца сучаснае абсталяванне, але работа больш ручная. Тут жа — выраб зрубаў. Ці патрэбны яны?

— Заказаў на 2 гады наперад, — сцвярджае Эдуард Казіміравіч.

Якія цэны на гэтыя вырабы?

 — Кубаметр ацыліндраваных бярвенняў у нас каштуе 1 мільён 700 тысяч рублёў, — пачынае падлікі гаспадар. — На зруб 6х9 метраў патрэбна дзесьці 30 кубоў, дабаўце кроквы, на ўсё спатрэбіцца мільёнаў 48. Ды заўважце — мы прапануем паўнацэнны будынак з бярвенняў не менш 28 сантыметраў у дыяметры, такія не прамерзнуць у любую сцюжу, прастаяць стагоддзе.

Таварыства забяспечана неабходнымі дрэваапрацоўчымі  станкамі. Тры спецыялісты завіхаліся ля стужкавай піларамы.

— Мы вырабляем абразныя і неабразныя дошкі, — тлумачыць далей Эдуард Казіміравіч, — дошкі для падлогі, вагонку, блокхаус, брусы. Лічу, што цэны ў нас памяркоўныя. Кубаметр неабразных дошак каштуе 850-950 тысяч рублёў, абразных — ад 1450000. Квадратны метр вагонкі абыйдзецца пакупніку ў 50 тысяч рублёў.

Для Дзісны дрэваапрацоўка ў ТАА "Аўтасэрвіс-Дзвіна" — даволі сур'ёзная вытворчасць. Зімой тут штомесяц ідзе ў справу 200-300 кубаметраў дзелавой драўніны, а летам аб'ёмы амаль падвойваюцца. Ды і попыт цяпер павялічваецца.

На здымках:  1. Кіраўнік ТАА «Аўтарсервіс-Дзвіна» Э. К. Цярэшка;  2. Дрэваапрацоўка на вытворчай базе. 

Л. МАТЭЛЕНАК.