Страхавому агенту Аксане ДЗЕМІДЗЁНАК кліенты давяраюць і заўсёды чакаюць у госці. У калектыве прадстаўніцтва Белдзяржстраху яна ў ліку лепшых. На сваім участку ў Міёрах настойліва працуе над павелічэннем ахопу паслугамі страхавання. Выконвае вытворчыя паказчыкі. Напярэдадні адзначыла дзень нараджэння. 

НА сваім прыкладзе Аксана паказвае, што страхоўшчык — гэта, у першую чаргу, надзейны сябар і лёгкі суразмоўца. Добра ведае сваіх кліентаў і іх патрэбы, а таму зносіны з кожным будуюцца гладка і нязмушана.

З такой працай сумаваць не даводзіцца. Кожны дзень у дарозе. У аднаго скончыўся тэрмін дзеяння дагавора страхавання. Другому трэба аформіць страхаванне маёмасці.

— Па тэлефоне дамаўляемся пра месца і час сустрэчы — і ў шлях. Раней дабіралася пешшу або на веласіпедзе. Цяпер выручае нядаўна набыты асабісты Аудзі 80, — дзеліцца радасцю субяседніца.

СТРАХАВЫ агент кансультуе, заключае з кліентамі дагаворы і кантралюе іх выкананне. З яе назіранняў, зараз людзі скрупулёзней клапоцяцца пра жыллё, маёмасць і грамадзянскую адказнасць. Набірае папулярнасць медыцынскае страхаванне. Захоўваецца тэндэнцыя, па якой кліентамі Белдзяржстраху становяцца пераважна дарослыя людзі з пэўным жыццёвым вопытам. Маладыя спецыялісты, якія нядаўна скончылі навучальныя ўстановы, не спяшаюцца звяртацца да паслуг страхавання.

АКСАНА Дземідзёнак у страхавой службе сем гадоў. Прыйшла ў прадстаўніцтва Белдзяржстраху з пэўным вопытам работы на мясакамбінаце і ў судзе.

— Паспрабавала — і ўсё атрымалася, хоць спачатку было складана, — успамінае. — Увялі ў курс справы калегі, дапамаглі асвоіцца.
На давераным участку многіх сваіх кліентаў ужо ведала, бо нарадзілася і вырасла ў Міёрах. Шукаць агульную мову не прыйшлося. Наогул, добра працаваць з людзьмі ў роднай мясцовасці. І ўсе знаёмыя, і атмасфера дамашняя.

Сама карыстаецца паслугамі Белдзяржстраху. З мужам Леанідам Анісіфаравічам маёмасць і прыватны дом аформілі і самі застрахаваліся задоўга да таго, як Аксана Сяргееўна прыйшла працаваць у гэту сферу. Дзеці таксама маюць страхавыя полісы. На чарзе і аўтамабіль. 

Фота Казіміра БЛАЖЭВІЧА.

Ігар МАТЭЛЕНАК.