Грамадскі кантроль за выкананнем заканадаўства аб ахове працы на рабочых месцах неабходна ўзмацніць. Пра гэта ішла размова на пасяджэнні Прэзідыума Савета Федэрацыі прафсаюзаў Беларусі. 

Тэхнічная інспекцыя працы ФПБ сумесна з прафсаюзнымі арганізацыямі, грамадскімі інспектарамі і наймальнікамі ў кожным рэгіёне рэспублікі кантралююць выкананне заканадаўства аб ахове працы на рабочых месцах. У 2016 годзе праведзена 131 праверка і 684 маніторынгі. Па іх выніках наймальнікам выдадзена 128 прадстаўленняў і 639 рэкамендацый на ліквідацыю 8600 парушэнняў. Прыпынена работа 200 адзінак станкоў, машын і іншага вытворчага абсталявання, эксплуатацыя якога пагражала жыццю і здароўю работнікаў.

Адзначана, што найбольш характэрнае парушэнне—адсутнасць на прадпрыемствах і ў арганізацыях перыядычнага кантролю за выкананнем заканадаўства аб ахове працы ці неўдзел грамадскіх інспектараў у ажыццяўленні кантролю. У ходзе работы рэйдавых груп тэхнічнай інспекцыі ФПБ надавалася ўвага стварэнню для работнікаў бяспечных і здаровых умоў працы, належнага вытворчага быту, выкананню тэмпературнага рэжыму, падпарадкаванню работадаўцаў калектыўным дагаворам. Практыка паказвае, што рэйды здольны паўплываць на сітуацыю ў лепшы бок.
Аднак тэхнічная інспекцыя працы прафсаюзаў ажыццяўляе сваю дзейнасць не дзеля штрафаў і пакаранняў, а для аказання дапамогі, выяўлення і своечасовай ліквідацыі недахопаў у сферы вытворчай бяспекі, стварэння належных санітарна-бытавых умоў для працаўнікоў, кантролю выпраўлення ранейшых парушэнняў.

Алена УСЦІНАВА,

Прэс-служба ФПБ па Віцебскай вобласці.